DÇ-2026-nın seçmə mərhələsi çərçivəsində Bakıda Ukrayna yığmasına qarşı keçiriləcək oyundan öncə Azərbaycan millisinin məşqçisi Rəşad Eyyubov mətbuat konfransında jurnalistlərin suallarını cavablandırıb.
90deqiqe.Az-ın məlumatına görə, mütəxəssis komandanın qarşıdakı oyuna ciddi şəkildə hazırlaşdığını bildirib:
“Oyuna yaxşı hazırlaşmışıq. Əsas məqsədimiz komandanı düşdüyü psixoloji vəziyyətdən çıxarmaqdır.”
Rəşad Eyyubov yığmanın potensialına da toxunub:
“Komandamız keyfiyyətli oyunçulardan ibarətdir. Bunu sabah meydanda göstərmək istəyirik. Qarşımıza yaxşı nəticə qazanmaq məqsədi qoymuşuq və bu niyyətlə meydana çıxacağıq.”
Qeyd edək ki, Azərbaycan – Ukrayna qarşılaşması sentyabrın 9-da Tofiq Bəhramov adına Respublika Stadionunda keçiriləcək və oyunun start fiti saat 20:00-da səslənəcək.
