Macarıstanda ikidilli təhsil müəssisələrinin sayı ildən-ilə artmaqda davam edir. Ölkənin Təhsil Nazirliyinin hesabatında qeyd olunur ki, bu məktəblərdə tədris macar dili ilə yanaşı, ingilis, alman, fransız və digər dillərdə də aparılır. İkidilli təhsil modeli şagirdlərin erkən yaşlardan xarici dil mühitində formalaşmasına, eyni zamanda beynəlxalq təcrübəyə daha tez uyğunlaşmasına şərait yaradır.
AzEdu.az-ın xarici mənbədən aldığı məlumata əsasən, bu cür məktəblərə həm valideynlərin, həm də şagirdlərin marağı yüksəlib. Çünki ikidilli təhsil alan uşaqlar sonrakı mərhələdə Avropa universitetlərinə qəbul zamanı daha çox üstünlüyə sahib olur. Bundan başqa, əmək bazarında xarici dil biliklərinin tələbi artdığından, bu məktəblərin məzunları iş imkanlarında da daha geniş seçim qarşısında qalır.
Mütəxəssislər bildirirlər ki, Macarıstanda ikidilli məktəblərin inkişafı ölkənin Avropa təhsil məkanına inteqrasiyasını gücləndirir. Bu model həm də müxtəlif mədəniyyətlər arasında qarşılıqlı anlaşmanı artırır, ölkədə yaşayan etnik azlıqların öz dillərini qoruyub saxlamaq imkanlarını genişləndirir.
Hazırda hökumət ikidilli məktəblərin sayını daha da artırmaq üçün yeni proqramlar üzərində işləyir. Məqsəd həm dil biliklərini, həm də qlobal bilik mübadiləsini təşviq etməkdir.
