Bəhruz Quliyev: “Azərbaycan gəncliyi yalnız müharibə sahəsində deyil, ölkənin yeni quruculuq dövründə də böyük vəzifələr daşıyır”
Gənclər hər bir dövlətin, xalqın gələcəyidir. Dövlətin uzunmüddətli inkişafı, siyasi, iqtisadi və sosial baxımdan möhkəmlənməsi, əhalisinin rifahının artırılması, xalqın milli kimliyini qoruması və beynəlxalq aləmdə tanınması əsasən gənc nəslin fəaliyyətindən asılıdır.
Gənclər yalnız bu günün yox, həm də gələcəyin qurucularıdır. Onlar hər bir dövlətin və xalqın davamlı inkişafını təmin edəcək və bu inkişafın yeni hədəflərə çatmasını şərtləndirəcək əsas qüvvədir. Gənclər yalnız dövlət idarəçiliyində deyil, həm də cəmiyyətin müxtəlif sahələrində öz sözünü deyir və fəaliyyətlərini daha da artırırlar. Bu səbəbdən müasir dövrümüzdə gənc nəslin düzgün yetişdirilməsi, onların vətənpərvərlik ruhunda tərbiyə olunması və dövlətin gələcəyi üçün düzgün istiqamətdə inkişaf etməsi olduqca vacib məsələdir. Gənclərin doğru tərbiyə edilməsi və düzgün istiqamətləndirilməsi dövlət siyasətində prioritet sahələrdən biri hesab olunur. Bu baxımdan Azərbaycanın müstəqil dövlət kimi formalaşmasından sonra gənclərin həyat və fəaliyyət sahəsindəki rolunu artırmaq məqsədilə genişmiqyaslı proqramlar həyata keçirilməyə başlanıb. Azərbaycanın gəncləri yalnız ölkə daxilində deyil, beynəlxalq arenada da müstəqil Azərbaycan dövlətini təmsil edirlər. Vətən müharibəsində gənclərin göstərdiyi qəhrəmanlıq və şücaət milli ruhu və vətənə bağlılığı bir daha sübut etdi. Bu, həm də Azərbaycanın gənclərə olan etimadını göstərir. Bu hərəkətləri ilə gənclər təkcə özləri üçün deyil, millət üçün böyük qürur mənbəyi oldular. Vətənə xidmət, heç şübhəsiz, ən müqəddəs vəzifədir və hər bir gənc öz dövlətini qorumaq üçün məsuliyyət daşımalıdır. Bu gün Azərbaycan həm regional, həm də beynəlxalq səviyyədə qalib, suveren və möhkəm dövlət olaraq tanınır. Azərbaycan gəncliyi tarixinin hər dövründə olduğu kimi, bu gün də öz vətəninə və dövlətinə qarşı məsuliyyətini tam şəkildə dərk edir. Onlar göstərdikləri qəhrəmanlıqlarla dünya birliyində Azərbaycanın adını ucaltmağa davam edirlər.
Azərbaycan gəncliyi yalnız müharibə sahəsində deyil, ölkənin yeni quruculuq dövründə də böyük vəzifələr daşıyır. Müzəffər dövlətin gələcəyini formalaşdırmaq, iqtisadiyyatın inkişafını təmin etmək, sosial sahədə daha da irəliləyişlər əldə etmək, Azərbaycanın beynəlxalq münasibətlərdəki mövqeyini möhkəmləndirmək və dünyanın diqqətini cəlb etmək gənclərin üzərinə düşən əsas vəzifələrdir. Hər bir gənc həm də öz işində liderlik bacarığına malik olmalı və milli ruhda tərbiyə olunmuş, zəka və bacarıqla dolu şəxsiyyət olaraq fəaliyyət göstərməlidir. Gənclərin bu xüsusiyyətləri ölkəmiz üçün daha yaxşı gələcəyin formalaşmasına böyük töhfələr verəcək. Gənclərin hər sahədə fəallığı, sosial, iqtisadi, humanitar və siyasi məsələlərdə geniş iştirakı onların ölkəmiz üçün nə qədər mühüm və irəliləyiş gətirən qüvvə olduqlarını göstərir. Azərbaycan gəncliyi ölkəmizin gələcəyi üçün ən böyük ümid mənbəyidir. Gənclərin fəaliyyətinə göstərilən dəstək və onların cəmiyyətin müxtəlif sahələrində liderlik rolu oynamaları ölkəmizin inkişafını daha da sürətləndirir. Məhz buna görə də gənclərimizin inkişafı üçün dövlət tərəfindən yaradılan geniş imkanlar onların hər birinin potensialını daha da artırır. Siyasi, sosial və iqtisadi tədbirlərdə iştirak edən gənclər Azərbaycan dövlətinin gələcəyini daha yaxşı formalaşdırmaq üçün öz güclərini ortaya qoyurlar.
“Səs” Media Qrupunun rəhbəri, politoloq Bəhruz Quliyev “Yeni Müsavat”a verdiyi şərhdə qeyd etdi ki, müstəqil Azərbaycanın qurulmasında və inkişafında gənclərin rolu xüsusilə mühümdür: “Heydər Əliyevin hakimiyyətə gəlməsindən sonra Azərbaycanda gənclər siyasəti genişləndirildi. Gənclərimizi tərbiyə edərək onları vətənə xidmətə hazırlamaq məqsədilə ciddi addımlar atıldı. Gənclərin inkişafı müstəqil Azərbaycan dövlətinin əsas prioritetlərinə çevrildi. 2003-cü ildən sonra Prezident İlham Əliyevin rəhbərliyi altında gənclər siyasəti daha da möhkəmləndi. 44 günlük Vətən müharibəsi nəticəsində əldə edilən qələbə gənclərin dövlət idarəçiliyindəki, milli təhlükəsizlikdəki, sosial həyatdakı və digər sahələrdəki rolunun artmasında böyük təsir göstərdi”.
Bəhruz Quliyev daha sonra əlavə etdi ki, bu gün Azərbaycan gəncləri artıq yalnız ölkə daxilində deyil, xarici səhnələrdə də öz ölkələrini layiqincə təmsil edirlər: “Onlar həm də müxtəlif sahələrdə yüksək nəticələr əldə edirlər. Dövlətin gənclər siyasətinin doğru istiqamətində formalaşan bu gənclər xarici diplomatiya, idman, elm, mədəniyyət və digər sahələrdə Azərbaycanın nüfuzunu artırmağa davam edirlər. Azərbaycan gəncləri müstəqilliyin bərpasından sonra hər zaman gələcəkdəki nəsil üçün örnək olub. Bugünkü gənclik həm də daha bir məsuliyyət daşıyır - qalib dövlətin vətəndaşı kimi davranmaq. Gənclərin Azərbaycanda davam edən sosial, siyasi və iqtisadi islahatlarda aktiv şəkildə iştirak etməsi onları daha da güclü və məsuliyyətli edir. Bu, həm də gənclərimizin milli ideologiya və vətəndaş məsuliyyətinə olan bağlılığını artırır. Bütün bu fəaliyyətlər gənclərimizin ölkənin gələcəyini formalaşdıran əsas qüvvə olduqlarını bir daha sübut edir. Bir sözlə, dövlətin gənclər siyasətinə uyğun olaraq, gənclər də öz gücünü və dəstəyini əsirgəməməlidir. Azərbaycançılıq, milli ideya və müstəqil dövlətin qorunması istiqamətində gənclərimiz öz məsuliyyətlərini daşımalı və davamlı şəkildə fəaliyyət göstərməlidirlər”.
Hazırladı: Nigar Həsənli
