Xroniki ağrısı olan insanların vəziyyəti çox vaxt mükəmməl olma istəyi və özlərini sərt tənqid etmələri səbəbindən daha da pisləşir.
Sherg.az xəbər verir ki, miqren, artrit və ya bel ağrısı kimi xəstəliklərdən əziyyət çəkənlər həm başqalarının gözləntilərini daha çox hiss edir, həm də özlərinə həddindən artıq yüksək tələblər qoyurlar.
Eyni zamanda, bu insanlar özlərinə qarşı daha az mərhəmət göstərir və çətinliklərlə mübarizə aparmaq qabiliyyətlərinə daha az inanırlar.
Tədqiqatçılar 1000-dən çox kanadalını sorğu-sual edərək müəyyən ediblər ki, xroniki ağrısı olan şəxslərdə həm sosial, həm də daxili mükəmməlliyyətçilik meyli daha yüksəkdir, özlərinə qarşı mərhəmət və özünəinam isə daha aşağıdır.
Bu psixoloji xüsusiyyətlər stresi artırır və fiziki əzabları daha kəskin hiss etdirir.
Araşdırmaya görə, özünə mərhəmət qoruyucu rol oynayır. O olmadıqda isə ağrı emosional olaraq daha da ağır yükə çevrilir.
Mütəxəssislərin sözlərinə görə, yaxşı xəbər odur ki, bu xüsusiyyətlər dəyişdirilə bilər. Terapiya və kouçinq bu meyilləri azalda, insanlara özlərinə qarşı daha yumşaq münasibət bəsləməyi öyrədə bilər.
