...İtaliyalı prodüser Andrea İervolino sentyabrın 4-də qaraciyər çatışmazlığından 91 yaşında dünyasını dəyişən əfsanəvi modelyer Giorgio Armani haq
qında bioqrafik film üzərində işə başladığını elan edib.
SİA-nın əldə etdiyi məlumata görə, bu barədə Deadline yazır.
İervolinonun sözlərinə görə, layihə “dünya modasının ən böyük yenilikçilərindən birinə hörmət etmək və italyan kimliyinin simvolu olmaq üçün şəxsi arzu” idi.
Ssenari müəllifi daha əvvəl Al Paçino, Entoni Hopkins və Endi Qarsiyanın rol aldığı “Maserati Qardaşları” bioqrafik filmində prodüserlə əməkdaşlıq etmiş “Oskar” mükafatçısı Bobbi Moresko tərəfindən yazılacaq.
Film 20-21-ci əsrlərin ən nüfuzlu modelyerlərindən sayılan Armani-nin şəxsi və peşəkar yolunu davam etdirəcək.
Filmin onun şəxsi həyatına, o cümlədən 1985-ci ildə vəfat etmiş biznes ortağı Sergio Qaleotti ilə münasibətlərinə, yoxsa yalnız karyerasına diqqət yetirəcəyi hələ də məlum deyil. Armani ailəsinin layihədə iştirak edib-etmədiyi də hələlik məlum deyil.
...Biz hamımız Armani brendini tanıyırıq, lakin bu adın arxasında duran insanı, onun fədakarlıqlarını, baxışlarını və bütün dünyada tanınan italyan arzusunu gerçəkləşdirən yolu tanıyanlar azdır, - deyə İervolino bildirib.
Bundan əvvəl, 2015-ci ildə Armani Martin Skorsezenin qısametrajlı filminin qəhrəmanı olmuşdu. Yeni layihə ikonik brendin arxasında duran insan haqqında tam hüquqlu bir hekayə olmaq üçün nəzərdə tutulub.
Nazlı Almuradova
