Sülh sazişi ABŞ-ın milli təhlükəsizlik maraqlarına xidmət edəcək...
Poliqon xəbər verir ki, ABŞ senatoru Stiv Deyns Bakı və İrəvan arasında sülh sazişinin Mərkəzi Asiyanın təhlükəsizliyi üçün vacibliyini vurğulayıb. Onun sözlərinə görə, ABŞ-ın regionla əlaqələrinin möhkəmləndirilməsi Amerikanın milli təhlükəsizliyi ilə birbaşa bağlıdır. Senator qeyd edib ki, bu sülh razılaşması yalnız regional sabitliyi təmin etməyəcək, həm də ABŞ-ın həyati əhəmiyyətli maraqlarına cavab verəcək.
Senator Deyns məsələyə münasibət bildirərkən vurğulayıb ki, Cənubi Qafqazda davamlı sülh ABŞ-ın bu strateji əhəmiyyətli regionda siyasi və iqtisadi təsirini artırmaq üçün əlverişli şərait yaradacaq. Onun fikrincə, Ermənistanla Azərbaycan arasında gərginliyin aradan qalxması yeni ticarət yollarının açılmasına, enerji təhlükəsizliyinin güclənməsinə və terrorçuluqla mübarizədə əməkdaşlığın inkişafına imkan yaradacaq. Bu, həmçinin, regionda Rusiyanın və digər qeyri-dost qüvvələrin təsirini azaltmağa kömək edə bilər.
Senatorun bu bəyanatı Ağ Ev administrasiyasının Cənubi Qafqazda sülh prosesini aktiv şəkildə dəstəkləmək niyyətində olduğunu göstərir. Belə ki, bu sülh sazişinin imzalanması, bölgədəki gərginliyi aradan qaldıraraq, Vaşinqtonun strateji maraqlarına uyğun bir sabitlik mühiti yarada bilər.
Poliqon.info
