Rusiya nefti alan Çin müəssisələri Avropa İttifaqınım hədəfində...
Avropa Komissiyası bir sıra müstəqil Çin neft emalı zavodlarının Rusiyaya qarşı 19-cu sanksiyalar paketinin siyahısına daxil edilməsi imkanlarını nəzərdən keçirir.
Poliqon xəbər verir ki, bu barədə "Reuters" agentliyi Aİ-dəki anonim rəsmi şəxslərə istinadən məlumat yayıb.
Agentliyin məlumatına görə, məhdudiyyətlərin yeni paketi Aİ nümayəndə heyətinin Vaşinqtondakı sanksiyalarla bağlı danışıqlardan qayıtmasından sonra, sentyabrın 12-də təklif oluna bilər. Sanksiya siyahısının Rusiyanın Qərb məhdudiyyətlərindən yan keçməsinə kömək edən üçüncü ölkələrdən olan şirkətlər — kiçik vasitəçi firmalardan tutmuş fəaliyyətdə olan müəssisələrə qədər genişləndirilməsi planlaşdırılır. Təklifə həmçinin iki Mərkəzi Asiya ölkəsinin banklarının da daxil ediləcəyi gözlənilir.
Bu addım Aİ-nin sanksiya rejiminin tətbiqini gücləndirmək və Rusiyanın Ukraynaya qarşı apardığı müharibəni maliyyələşdirmək imkanlarını məhdudlaşdırmaq niyyətini göstərir. Çin neft emalı zavodlarının hədəfə alınması, Rusiyanın enerji ixracının əsas alıcılarından birinə qarşı atılan mühüm addım kimi qiymətləndirilir. Bu, həmçinin, Aİ-nin sanksiyaların təsirini genişləndirmək və onları pozan tərəfləri cəzalandırmaq qətiyyətinin göstəricisidir.
Poliqon.info
