Qiymət tavanı 60 dollardan 47,6 dollara salınıb, sanksiyalar isə genişləndirilib...
Poliqon xəbər verir ki, Yeni Zelandiya hökuməti Rusiya neftinə tətbiq olunan qiymət tavanını 60 ABŞ dollarından 47,6 dollara qədər endirib. Bu barədə ölkənin Xarici İşlər Nazirliyinin rəsmi saytında yayımlanan açıqlamada bildirilib. Yeni qərar çərçivəsində həmçinin anti-Rusiya sanksiyalarının dairəsi genişləndirilib: daha 19 fiziki və hüquqi şəxs, eləcə də 19 neft tankeri sanksiya siyahısına əlavə olunub.
Rəsmi bəyanatda qeyd olunur ki, bu addım “Rusiya Federasiyasının neft satışından əldə etdiyi həyati vacib gəlirləri azaltmaq məqsədi daşıyan düşünülmüş qərardır”. Yeni Zelandiya rəsmiləri vurğulayıb ki, Rusiya iqtisadiyyatının əsas gəlir mənbələrindən biri olan enerji ixracına zərbə vurmaq Moskvanın xarici siyasətdəki mövqelərini zəiflətmək üçün effektiv vasitə hesab olunur.
Sanksiyalara məruz qalan fiziki və hüquqi şəxslərin isə kimyəvi silahların yayılması və dezinformasiya kampaniyalarının aparılmasında iştirak etdikləri iddia edilir. Onların arasında həmçinin alternativ ödəniş sistemləri ilə məşğul olan və vasitəçi qismində çıxış edən qurumların olduğu, Şimali Koreya və İranla əlaqələrinə görə hədəfə alındıqları bildirilir.
Yeni sanksiyaların diqqətçəkən hissəsi isə 19 neft tankerinə qarşı tətbiq edilən məhdudiyyətlərdir. Yeni Zelandiya tərəfi bu gəmilərin Rusiyanın neft embarqosunu aşmaq üçün istifadə etdiyi “kölgə donanması”na aid olduğunu bəyan edib. Bu donanmanın əsas məqsədi Rusiya neftini üçüncü ölkələr vasitəsilə gizli marşrutlarla bazara çıxarmaqdır.
Xarici İşlər Nazirliyinin açıqlamasında vurğulanır ki, bu addımlar Yeni Zelandiyanın müttəfiqləri ilə koordinasiyada atılır və beynəlxalq təzyiq mexanizmlərinin gücləndirilməsinə xidmət edir. Nazirlik həmçinin əlavə edib ki, sanksiyaların genişləndirilməsi Rusiya hökumətinə qarşı təzyiqi artırmaqla yanaşı, onun beynəlxalq hüquqa zidd fəaliyyətlərinə cavab xarakteri daşıyır.
Beləliklə, Yeni Zelandiya Rusiyaya qarşı iqtisadi sanksiyaların sərtləşdirilməsi xəttini davam etdirir və Moskvanın enerji ixracından əldə etdiyi gəlirləri azaltmaq üçün konkret addımlar atır.
Poliqon.info
