22 avqust 2025-ci il tarixində “Atəşgah” Sığorta Şirkəti ASC-nin Direktorlar Şurasının sədri vəzifəsinə Azər Allahverdi oğlu Əliyev təyin olunub.
Sığorta sahəsində zəngin təcrübəyə malik olan Azər Əliyev “Atəşgah” Sığorta Şirkətində müxtəlif rəhbər vəzifələrdə çalışmışdır. O, 2008–2010 və 2017–2022-ci illərdə şirkətin İdarə Heyətinin sədri, 2025-ci ilin may ayından isə Direktorlar Şurasının üzvü kimi fəaliyyət göstərmişdir.
Bundan əlavə, Azər Əliyev digər nüfuzlu qurumlarda da mühüm vəzifələrdə çalışmışdır. 2019-cu ildən Azərbaycan Sığortaçılar Assosiasiyasının sədri, daha sonra isə Assosiasiyanın Müşahidə Şurasının sədri vəzifələrini icra etmişdir. Eyni zamanda, İcbari Sığorta Bürosunun Himayəçilər Şurasında sədr və sədr müavini kimi fəaliyyət göstərmişdir. Azər Əliyev, həmçinin 10 yanvar 2023-cü ildən 13 fevral 2024-cü il tarixinədək Dayanıqlı və Operativ Sosial Təminat Agentliyinin İdarə Heyəti sədrinin müşaviri vəzifəsini də icra etmişdir.
Peşəkar fəaliyyəti ərzində Azər Əliyev üzərinə düşən vəzifələri daim məsuliyyətlə yerinə yetirmiş, “Atəşgah” Sığorta Şirkətinin uğurlarında mühüm pay sahibi olmuşdur. O, həmçinin Azərbaycan Respublikasının Mərkəzi Bankı və Azərbaycan Sığortaçılar Assosiasiyasının birgə təşəbbüsü ilə həyata keçirilən maarifləndirici layihələrdə fəal iştirak edərək, ölkədə sığorta mədəniyyətinin formalaşmasında əhəmiyyətli rol oynamışdır.
