Maya Sandu Moskvaya qarşı ittihamlar səsləndirib: Rusiya bu təcrübəni digər ölkələrə də yayır...
Poliqon xəbər verir ki, Moldova Prezidenti Maya Sandu "The Financial Times"a müsahibəsində Rusiyanı sentyabrın 28-də keçiriləcək parlament seçkilərinə təsir etmək üçün geniş kampaniyaya başlamaqda ittiham edib. Sandunun sözlərinə görə, bu kampaniyaya xaricdə yaşayan seçicilərə təsir, dezinformasiya, təxribat və Rusiya Pravoslav Kilsəsinin din xadimlərinin iştirakı daxildir.
"Rusiyalılar hədəf olaraq diasporu seçiblər", — deyə prezident qeyd edib. O, Moskvanın Moldovanın Avropa İttifaqına inteqrasiya səylərini əngəlləmək üçün Rusiya Pravoslav Kilsəsinin din xadimlərindən təbliğat yaymaq, həmçinin "Matryoshka" bot şəbəkəsindən istifadə etdiyini bildirib. Bu botlar xarici medianın adından saxta xəbərlər və məzmun yaradır.
Sandu Rusiyanın bu hərbi taktikalarının davamlı olaraq dəyişdiyini vurğulayıb. Onun sözlərinə görə, Moskvaya yaxın kriminal qruplar artıq Moldova həbsxanalarında iğtişaşlar salmaq üçün istifadə olunur. "Rusiya bizim institutlarımızı sıradan çıxarmaq üçün həqiqətən geniş spektrli alətlərdən istifadə edir", — deyə o əlavə edib.
Prezident Sandu Avropa İttifaqına müraciət edərək, Moldovanın təcrübəsindən nəticə çıxarmağa çağırıb. "Moldova kövrək demokratiyadır və biz görürük ki, Rusiyanın Moldovada sınaqdan keçirdiyi bəzi hərəkətlər daha sonra digər ölkələrə də köçürülür. Biz demokratik sistemlərimizə qarşı olan təhlükəni heç vaxt qiymətləndirməməliyik", — deyə o xəbərdarlıq edib.
Sandu sentyabrın 28-də keçiriləcək parlament seçkilərini Moldovanın Avropa İttifaqına üzvlük yolunda son mühüm maneə adlandırıb.
Poliqon.info
