ABŞ Ukraynaya 33 min süni intellektli dronu göndərəcək
Ajans.az xəbər verir ki,bu barədə Financial Times məlumat yayıb. Dronlar hücum zamanı öz aralarında koordinasiya yaradaraq “sürü” kimi hərəkət edə bilir. Bu taktika düşmənin müdafiəsini aşmaq və hücum gücünü artırmaq baxımından mühüm hesab olunur. İstehsalçı Amerika-Almaniya şirkəti Auterion-un rəhbəri Lorenz Mayer deyib: “Bütün ordular sürü hücumlarından danışır. Hamı bunun təhlükəli olduğunu və müdafiəni sıradan çıxara biləcəyini bilir.” Şirkətin Nemyx adlı platforması bir neçə dronun vahid sistem kimi idarəsini mümkün edir. Operatorun iş yükü azalır, hücumların dəqiqliyi və səmərəliliyi isə artır. Almaniyanın Systematic şirkəti ilə əməkdaşlıq edən Helsing şirkətinin nümayəndəsi vurğulayıb ki, süni intellektli sürü taktikası daha güclü hücum imkanları təqdim edir. Eyni zamanda, proqram təminatı sayəsində bir operator bir neçə dronu eyni anda idarə edə bilir. Ukrayna bu sahədə xüsusi üstünlüyə malikdir. Yerli texnologiya şirkətləri süni intellekti real döyüş videoları əsasında təlimləndirir. Kiyevdə yerləşən D3 investisiya firmasının tərəfdaşı Evelina Buchatska bildirib: “Ukraynada mövcud olan döyüş görüntüləri bu texnologiyanın inkişafında əsas rol oynayır.” Ukraynanın Swarmer şirkəti artıq süni intellektli dronları minalama və hücum əməliyyatlarında tətbiq edib. The Wall Street Journal yazır ki, bu, sürü texnologiyasının döyüşdə müntəzəm istifadəsinin dünyada ilk nümunəsidir. Şirkət hazırda proqram təminatını eyni vaxtda 25 dronda sınaqdan keçirib.
