Avtosfer saytından verilən məlumata görə, ain.az xəbər verir.
Bəzi sürücülər ötmənin qadağan olunduğu yollarda yol nişanına məhəl qoymadan hərəkət edirlər. Halbuki, “Ötməni qadağan edən” (3.20) yol nişanı quraşdırılan yollarda sürücülər daha çox ehtiyatlı davranmalıdır. Bu nişan əsasən yolun dar, sürüşkən, daşlı-çınqıllı, döngəli və ya görünüşün məhdud olduğu yerlərində yerləşdirilir və sürücüləri mümkün təhlükələr barədə öncədən xəbərdar edir. Nişanın qüvvədə olduğu ərazidə ötmə yalnız xüsusi hallarda (təcili yardım, yanğınsöndürən və ya polis avtomobillərinə yol vermək üçün) icazəlidir.
Qaydanı pozaraq ötmə edən sürücülər isə həm özləri, həm də digər yol iştirakçıları üçün ciddi təhlükə yaradırlar.
Qeyd olunan məsələ ilə bağlı izləyicilərdən biri Avtosfer.az-ın “Instagram” ünvanına video göndərərək şikayət edib. Hadisə bir neçə gün əvvəl, günorta saatlarında Bakı–Qəbələ yolunda qeydə alınıb. Hərəkətdə olan 27-BG-377 dövlət nömrə nişanlı “Toyota Camry” markalı avtomobilin sürücüsü yol nişanına məhəl qoymadan önündəki maşını ötüb.
İzləyici bildirib ki, təmir səbəbindən yol əlverişsiz – daşlı və çınqıllı olduğundan, “Toyota” sürücüsü onu ötərkən avtomobildən qalxan daşlar onun maşınına dəyib. Nəticədə qayda pozan sürücü avtomobilin şüşəsinə və kənar hissələrinə maddi ziyan vurub. Zərərçəkmiş siqnal verərək “Toyota” sürücüsünə xəbərdarlıq etsə də, o, dayanmadan yoluna davam edib.
Nərmin
Sonrakı hadisələr barədə daha çox məlumat almaq üçün ain.az saytını izləyin.
