Britaniya kral ailəsi ABŞ prezidenti Donald Tramp və xanımı Melaniyanın səfərinə hazırlaşır. Onlar sentyabrın 16-da axşam saatlarında Londona gələcəklər.
Reyting.az xəbər verir ki, analitiklər Trampın 3 günlük səfərini Britaniya kral ailəsi üçün əsl sınaq hesab edirlər.
“Kral III Çarlz xırda söhbətlərin pərəstişkarı deyil. Xanımı Kamilla Melaniya kimi məftunedici üslubu bölüşmür. Bu, ən yaxşı kombinasiya deyil, çünki Tramp ərköyün olmağı xoşlayır. III Çarlz isə bunu edə bilməz”, - saray işçisi “Bild” nəşrinə deyib.
Buna görə, kral Uels şahzadəsi Keyt Middletonun diplomatik cazibəsinə ümid edir.
“Proqram əlverişsiz və yöndəmsiz vəziyyətlərin riskini minimuma endirmək üçün ən xırda detallara qədər planlaşdırılıb. Şahzadə Keytə və onun cazibəsinə böyük ümidlər bağlanıb”, - saraydakı mənbə bildirib.
Şahzadə Keyt və Şahzadə Uilyam Tramp və həyat yoldaşını Vindzor qəsrində ilk qarşılayanlar olacaqlar. Onlar qonaqları Kral III Çarlz və Kraliça Kamillaya qədər müşayiət edəcəklər. Sonra açıq havada geniş miqyaslı qarşılanma mərasimi olacaq.
Salamlaşmadan sonra Vindzorda faytonla gəzinti, hərbi paradın və fəxri qarovul dəstəsinin təntənəli şəkildə keçirilməsi planlaşdırılır. Tramp və Melaniya kral süfrəsində nahar zamanı kral qonaqpərvərliyi ilə qarşılanacaqlar.
Səfərin kulminasiya nöqtəsi sentyabrın 17-də III Çarlz və Trampın çıxış edəcəyi ziyafət olacaq.
Ertəsi gün kralın yola salınmasından sonra Tramp Böyük Britaniyanın baş naziri Key Starmerlə görüşəcək.
Tramp artıq bu səfərdən məmnun olduğunu bildirib və kraldan dəvət alanda deyib:
“Ölkəniz fantastikdir, gəlmək bizim üçün şərəfdir”.
Dünən Trampın Londona səfər edəcəyi məlum olub. Britaniya kral ailəsi Amerika prezidentini maksimum diplomatik təsir nümayiş etdirərək qarşılamağa hazırlaşır.
V. QULİYEV
