Lukaşenko: Rusiya və Belarus nüvə silahlarının işə salınmasını sınaqdan keçirir
Ajans.az xəbər verir ki,bu barədə Rusiya mediası məlumat verib. Beş günlük "Zapad" (Qərb) kod adlı müharibə oyunları çərçivəsində Rusiya və Belarus döyüş hazırlığını sınaqdan keçirir. Belarus Baş Qərargahına istinadən dövlət mediası təlimlər zamanı Rusiyanın ötən il Ukraynaya qarşı istifadə etdiyi “Oreşnik” hipersəs raketinin də nümayiş etdirildiyini bildirib. Lukaşenko bildirib ki, bu cür silahların təlimlərdə istifadəsi "təbiidir" və gizlədilmir: “Biz orada hər şeyi tətbiq edirik — adi silahlardan tutmuş nüvə başlıqlarına qədər. Bunu gizlətmirik. Əks halda, niyə onlar Belarus ərazisində olardılar?”, – deyə o, vurğulayıb. Eyni zamanda əlavə edib ki, heç kəsi təhdid etmək niyyətində deyillər. Belarus Müdafiə Nazirliyi də təlimlərdə taktiki nüvə silahlarının sınaqdan keçirildiyini təsdiqləyib. Bu hadisə Polşa və NATO qüvvələrinin Rusiya pilotsuz təyyarələrinin Polşa hava məkanına daxil olması ilə bağlı narahatlıqlar fonunda baş verir. Varşava ehtiyat tədbiri olaraq Belarusla sərhədi müvəqqəti bağlayıb. Qeyd edək ki, Belarus hazırda Rusiyanın taktiki nüvə silahlarına ev sahibliyi edir və Sovet dövrünə aid nüvə obyektlərini yenidən aktivləşdirir. Rusiya prezidenti Vladimir Putin bu silahların 2025-ci ilin ikinci yarısından etibarən Belarusda yerləşdirilə biləcəyini açıqlayıb. ABŞ ilə Belarus arasında münasibətlərdə yumşalma müşahidə olunur. Vaşinqton bəzi sanksiyaları 52 siyasi məhbusun azad edilməsi müqabilində yüngülləşdirib. ABŞ hərbi müşahidəçiləri bu həftə keçirilən Zapad təlimlərinin bir hissəsində iştirak ediblər.
