Roma, 16 sentyabr, AZƏRTAC
Avropa İttifaqının (Aİ) hərəkətsizliyi onun suverenliyini təhdid edir.
AZƏRTAC xəbər verir ki, bu sözləri İtaliyanın sabiq Baş naziri, Avropa Mərkəzi Bankının keçmiş rəhbəri Mario Draqi deyib.
“Aİ-nin iqtisadi artım modeli effektivliyini itirir, zəifliklər artır. Bizə lazım olan sərmayələri maliyyələşdirmək üçün aydın bir yol yoxdur. Fəaliyyətsizlik təkcə rəqabət qabiliyyətimizi deyil, həm də suverenliyimizi təhdid edir. Avropa vətəndaşları və biznesləri diaqnozu, aydın prioritetləri və fəaliyyət planlarını yüksək qiymətləndirirlər. Lakin onlar həm də artan məyusluqlarını ifadə edirlər. Onlar Aİ-nin ləngliyindən məyus olurlar, bizim başqa yerdəki dəyişiklik sürəti ilə ayaqlaşa bilməyəcəyimizi görürlər. Onlar hərəkətə keçməyə hazırdırlar, lakin hökumətlərin vəziyyətin ağırlığını dərk edə bilmədiklərindən qorxurlar. Çox tez-tez bu ləngliyə bəhanələr gətirilir və bu, özündən razılıqdır. Diqqəti yeni sürətə və illər ərzində deyil, aylar ərzində nəticələrə yönəltmək lazımdır”, - deyə o bildirib.
Mario Draqi qeyd edib ki, ABŞ ötən müddətdə Aİ-yə ən yüksək tarifləri tətbiq etdi, Çin daha da güclü bir rəqibə çevrildi: “İqtisadi çəkimiz əhəmiyyətli olsa da, biz Avropanın cavab vermək qabiliyyətinin asılılıqları ilə necə məhdudlaşdığını gördük. Müdafiə üçün ABŞ-dan asılılıq Birləşmiş Ştatların ticarət müqaviləsini qəbul etməli olduğumuz səbəblərdən biri kimi göstərildi. Avropa İttifaqının dövlət borcunun növbəti onillikdə 10 faiz bəndi artaraq ÜDM-in 93 faizinə çatması nəzərdə tutulur, artım fərziyyələri bugünkü reallıqdan daha optimistdir. Buna görə də bir il sonra Avropa daha çətin vəziyyətə düşə bilər”.
Nihad Budaqov
AZƏRTAC-ın xüsusi müxbiri
Roma
