Musavat.com xəbər verir ki, Gürcüstan Prokurorluğu ölkəyə 624 milyon ABŞ dolları və 35 milyon avro məbləğində qanunsuz gəlirlərin leqallaşdırılması ittihamı ilə bir nəfərin həbs olunduğunu açıqlayıb.
Bu, ölkə üzrə indiyə qədər aşkar olunan ən böyük məbləğ hesab olunur.
Cinayət sxemi
İstintaqın məlumatına görə, 2022–2024-cü illər ərzində cinayətkar qrupun üzvləri qonşu ölkələrdən sənədləşdirilməmiş böyük həcmdə xarici valyutanı gizli şəkildə Gürcüstana gətirərək həbs olunan şəxsə təhvil veriblər.
Həmin şəxs isə valyuta mübadilə məntəqəsi adı altında bu pulları qanuni dövriyyəyə daxil edib — vəsaitləri banklara təqdim edərək onların guya şəxsi gəlirləri olduğunu göstərib, daha sonra isə pulları digər şəxslərə köçürüb, valyuta dəyişdirib və daşınmaz və daşına bilən əmlak alıb.
Cəza və müsadirələr
Prokurorluq bildirib ki, saxlanılan şəxsə qarşı 12 ilədək həbs cəzası nəzərdə tutulur.
Qurum həmçinin xatırladıb ki, oxşar faktlara görə daha əvvəl 7 nəfər məhkum edilib və məhkəmə onların təxminən 13 milyon lari (4,8 milyon dollar) dəyərində əmlakını müsadirə edib.
Musavat.com
