“Qarabağ” ÇL-də “Barselona”nın nailiyyətini təkrarladı

Azərbaycan çempionu “Qarabağ” UEFA Çempionlar Liqasında (ÇL) İspaniya təmsilçisi “Barselona”nın nailiyyətini təkrarlayıb.

Arena.az bu barədə Beynəlxalq Futbol Tarixi və Statistikaları Federasiyasının rəsmi saytına istinadən xəbər verir.

Bildirilir ki, “Benfika” 2025-ci ilədək heç vaxt qitənin bir nömrəli klub turnirində 2 top fərqi ilə öndə olduğu matçı uduzmayıb.

Lissabon komandası artıq cari ildə iki dəfə bu aqibəti yaşayıb. Portuqaliya təmsilçisi ilin əvvəlində, “Barselona” ilə ÇL-in 2024/2025-ci illər mövsümünün Liqa mərhələsinin 7-ci turunun matçında 4:2 hesabı ilə öndə olandan sonra yenilib – 4:5.

Xatırladaq ki, “Qarabağ” səfərdə “Benfika”nı 3:2 hesabı ilə üstələyib. Meydan sahibləri 30-cu dəqiqəyədək 2:0 hesabı ilə üstün olublar. Amma ruhdan düşməyən Azərbaycan çempionu qalan dəqiqələrdə ardıcıl 3 qol vurmağı bacarıb və tarixi zəfərə imza atıb.