Qaynarinfo saytından əldə olunan məlumata görə, ain.az məlumat yayır.
Almaniyanın ən varlı ailələrindən olan Blok ailəsinin varisi Kristina Blokun uşaqlarını qaçırma planı ilə bağlı mühakiməsi beynəlxalqmiqyaslı gizli əməliyyatın şok detalları ilə gündəmə gəlib.
Qaynarinfo xəbər verir ki, məlumata görə, Danimarkada yaşayan keçmiş həyat yoldaşı Stefan Henseldən uşaqlarının qəyyumluğunu almaq istəyən Blok aralarında İsrail ordusunun sabiq zabitinin də olduğu qrupla iş birliyi edib.
İttihamlara görə, Hamburq mərkəzli restoran şəbəkəsi "Block House"un ortaqlarından olan Kristina Blok uşaqlarını qaçırmaq üçün İsrail ordusunun 504-cü bölməsində yüksək vəzifə tutmuş sabiq zabit David Barkay ilə razılığa gəlib. Hamburq polisi Barkayın əməliyyatı təşkil etdiyini, plana rəhbərlik etdiyini və iştirakçıları topladığını müəyyənləşdirib. Onunla yanaşı, döyüş sənətləri məşqçisi, "Dr. Nunchaku" ləqəbli Tal Sason və Barkayın tərəfdaşı Keren Tennenbaum Algem də əməliyyatda iştirakda ittiham olunur.
Müstəntiqlər müəyyən edib ki, şübhəlilər saxta adlarla Hamburqdakı dəbdəbəli "Grand Elysee" otelində qalıb və buranı qərargah kimi istifadə ediblər. Komandanın 200 gecə oteldə qalmasına təqribən 250 min avro xərclənib.
Bir şübhəli Cənubi Kiprdə yaxalandı
Qaçırmada iştirak edən şübhəlilərdən Tal Sason Cənubi Kiprdə saxlanılaraq Almaniyaya təhvil verilib. David Barkay, Keren Tennenbaum Algem və daha dörd israilli şübhəli barəsində beynəlxalq axtarış elan olunub.
"Haaretz" qəzetinin məlumatına görə, məhkəmədə Tal Sason əməliyyata qatıldığını etiraf edib və özünü "uşaqları pis atadan xilas edən superqəhrəman" kimi hiss etdiyini söyləyib. Kristina Blok isə bütün ittihamları rədd edir və Barkayı yalnız kiber təhlükəsizlik yoxlamaları üçün işə götürdüyünü bildirir.
Alman kəşfiyyatının sabiq rəhbəri də şübhəlidir
Hadisədə Almaniyanın sabiq kəşfiyyat rəhbəri Auqust Hanninqin də adı keçir. İddiaya görə, Hanninq Blok ailəsi ilə israilli şübhəlilər arasında vasitəçilik edib. O isə məhkəmədə bütün iddiaları təkzib edib.
Hədəf - Ata haqqında qarayaxma kampaniyası
Polisin ələ keçirdiyi Barkaya məxsus qeyd dəftərində əməliyyatın planlaşdırılmasına dair ətraflı qeydlər aşkar olunub. Henselin Danimarkadakı evinin aylarla izlənməsi, evə gizli kamera yerləşdirilməsi, hətta dron istifadəsi planları sənədlərdə öz əksini tapıb. Habelə "Bay M" adlandırılan sabiq israilli jurnalistin Henselin etimadını qazanmaq üçün müsahibə bəhanəsi ilə evə daxil olmağa çalışdığı qeyd olunub.
İddialara görə, Blok və Barkay Henseli pedofiliya ilə günahlandıran saxta kiber hesabatlar hazırlayıb və bu sənədləri polisə təqdim edib. Ancaq araşdırmalar nəticəsində hesabatların saxta olduğu üzə çıxıb və istintaq Blokun özünə yönləndirilib. Bu plan uğursuz alındıqdan sonra uşaqların zorla qaçırılması planına keçilib.
Qaçırma əməliyyatı
2023-cü ilin 31 dekabr gecəsi maskalı şəxslər Danimarkanın Qraasten şəhərində Henselə hücum edərək onun 10 yaşlı oğlu Teo və 13 yaşlı qızı Klaranı qaçırıb. Uşaqlar əvvəlcə meşəlik ərazidən Almaniya sərhədinə aparılıb və orada gözləyən maşına mindiriliblər. Beş saatlıq səyahətdən sonra onlar Ştutqart yaxınlığındakı alpaka fermasına gətirilib.
Ertəsi gün uşaqlar anası Kristina Bloka təhvil verilib. O, onları Baden-Vürtemberq əyalətindəki bir kənd evinə aparıb. Henselin uşaqlarına taxdığı siqnal cihazı sayəsində polis tezliklə izə düşüb və axtarışlara başlayıb. Qısa müddət sonra Blok uşaqları polisə təhvil verib, daha sonra isə Almaniya hakimiyyəti onları Danimarkaya qaytarıb.
Xarici mediada dərc olunan xəbərlərdə bildirilir ki, davam edən məhkəmə "beynəlxalq cinayət şəbəkəsinin və qəyyumluq uğrunda mübarizənin fövqəladə metodlarının araşdırıldığı mürəkkəb bir hüquqi proses" kimi xarakterizə olunur.
Aydın
Daha ətraflı məlumat və yeniliklər üçün ain.az saytını izləyin.
