Azərbaycanın Xüsusi Rabitə və İnformasiya Təhlükəsizliyi Dövlət Xidməti (XRİTDX) dövlət qurumlarının və ictimai təhlükəsizlik orqanlarının ehtiyaclarına uyğunlaşdırılmış, müasir və təhlükəsiz TETRA radio rabitə sisteminin hərtərəfli modernləşdirilməsini həyata keçirmək üçün ABŞ-ın “Motorola Solutions” şirkətini seçib.
“Poliqon” xəbər verir ki, bu barədə “Financial Times” qəzetində dərc olunan məqalədə deyilir.
“Motorola Solutions”un “DIMETRA Connect” texnologiyası radio şəbəkəsinə inteqrasiya olunacaq ki, bu da istifadəçilər radio əhatə dairəsindən kənara çıxdıqda TETRA funksiyalarının genişzolaqlı rabitə üzərindən fasiləsiz şəkildə davam etməsinə imkan verəcək. MXP660 çoxdaşıyıcılı portativ radiolar inteqrasiya olunmuş şəbəkələrdə istifadə ediləcək və dövlət qurumlarının genişləndirilmiş əhatə dairəsi və etibarlı əlaqədən faydalanmasını təmin edəcək.
Bundan əlavə, “Motorola Solutions” DIMETRA TETRA sistemində coğrafi ehtiyatlılıq tətbiq edəcək. Bu yanaşma birdən çox məlumat mərkəzi üzərində qurularaq elektrik kəsintiləri, təbii fəlakətlər və digər gözlənilməz hadisələr zamanı sistemin davamlı fəaliyyətini və dayanıqlığını gücləndirəcək.
Şirkət həmçinin Azərbaycan radio rabitə şəbəkəsinin ən yüksək TETRA standartlarına uyğun fəaliyyətini dəstəkləmək məqsədilə üç il müddətinə hərtərəfli dəstək xidmətləri göstərəcək. Bu xidmətlərə aparat və proqram təminatı yeniləmələri, antivirus mühafizəsi və profilaktik sistem baxışı daxil olacaq.
“Bu müqavilə ilə müasir informasiya təhlükəsizliyi texnologiyalarının tətbiqində öncüllərdən biri olan XRİTDX bir daha Azərbaycanın innovasiya, dayanıqlılıq və informasiya təhlükəsizliyinə uzunmüddətli sadiqliyini təsdiqləyir. Modernləşdirmə proqramı dövlət qurumlarında kritik informasiya infrastrukturunun etibarlılığını və davamlılığını daha da artıracaq”, – deyə XRİTDX rəisi müqavilənin imzalanma mərasimində bildirib.
“Motorola Solutions” şirkətinin Yaxın Şərq, Şimali Afrika və Mərkəzi Asiyaya satışlar üzrə vitse-prezidenti Serxio Redomero Qonsales isə qeyd edib ki, təhlükəsiz rabitə sahəsində qlobal lider olan “Motorola Solutions”, Azərbaycan radioşəbəkəsinin böyük modernləşdirilməsində XRİTDX-ni dəstəkləməkdən qürur duyur: “Bu sərmayə özünü doğrultmuş TETRA texnologiyasını genişləndirir və daha da təhlükəsizləşdirir, ictimai təhlükəsizlik qurumlarının isə indiki və gələcəkdə qarşılaşacaqları mürəkkəb çağırışlarla effektiv mübarizə aparmaq üçün fasiləsiz və etibarlı ünsiyyət saxlamasına imkan yaradır”.
Radio rabitə şəbəkəsinin modernləşdirilməsi layihəsi şəbəkənin fəaliyyətini beynəlxalq standartlarla uyğunlaşdırmaqda və qlobal, həmçinin regional tərəfdaşlarla əməkdaşlığın gücləndirilməsində mühüm rol oynayır.
