50-yə yaxın Rusiya vətəndaşı və onların ailə üzvləri sentyabrın 17-də Qəzza zolağından İordaniyaya təxliyə edilib.
NOCOMMENT.az bildirir ki, bu barədə təxliyə edilənlərdən biri Xalid Attar RİA Novosti-yə bildirib.
“Dünən Rusiyanın Ramallahdakı diplomatik nümayəndəliyi məni, ailəmi və anamı Qəzza zolağından təxliyə edərək, hazırda yerləşdiyim İordaniyaya keçidimizi təmin etdi. Sabah Sankt-Peterburqa gedəcəyik”, – o deyib.
Rusiya Xarici İşlər Nazirliyi təxliyə edilənlərin İsrail-İordaniya sərhədindəki Allenbi keçid məntəqəsinə aparıldığını, daha sonra rus diplomatlarına təhvil verildiyini bildirib. Rusiyanın Fələstin Milli Administrasiyasındakı missiyası və İordaniyadakı səfirliyi rusların anklavdan çıxarılmasına köməklik göstərib.
Sentyabrın 16-da İsrail Müdafiə Qüvvələri (İDF) anklavın şimal hissəsində yerləşən eyniadlı şəhəri tamamilə ələ keçirmək məqsədi ilə Qəzza zolağına yeni genişmiqyaslı hücuma başlayıb. Təl-Əvivdə hökumətin qərarına qarşı kütləvi etirazlar başlayıb. Bununla belə, Baş nazir Benyamin Netanyahu bəyan edib ki, İsrail “təcrid olunmağa” və yeni çağırışlara hazırdır.
