“Sabah”ın və Azərbaycan millisinin yarımmüdafiəçisi Abdula Xaybulayev Sportinfo.az-a müsahibə verib.
24 yaşlı futbolçu Premyer Liqanın dördüncü turunda “Neftçi” ilə qolsuz bərabərliklə yekunlaşan qarşılaşma haqda sualları cavablandırıb.
- Nəticə sizi qane edir?
- Hiss olunurdu ki, “Neftçi” bu oyuna hədsiz köklənib. Çox yaxşı mübarizə aparırdılar. Biz isə daha çox qaçmaqla diqqəti əldən verməməyə çalışırdıq. Həqiqətən ağır oyun oldu. Fikrimcə, nəticə oyuna görə oldu.
- 1 xalı qazanc hesab edirsən? Bəzi futbolçularınızın hərəkətlərindən görüşün məhz bu hesabla başa çatmasını arzuladıqları görünürdü. Təkcə Stas Pokatilovun bir neçə epizodda topu oyuna gec daxil etməsini göstərə bilərəm.
- Məqsədimiz qalib gəlmək idi. “İmişli” məğlubiyyətindən sonra 3 xal istəyirdik. Lakin bəzən oyunun gedişatı istədiyin kimi alınmır deyə, 1 xal da pis nəticə sayılmır. Qələbə əla olardı. Rəqibin “Neftçi” olduğunu da unutmamalıyıq.
- Sanki bu gün “Sabah”da görməyə alışdığımız motivasiya çatmırdı. Olmaya aparıcı futbolçuların yoxluğu özünü göstərirdi?
- Motivasiya yüksək səviyyədə idi. Dediyim kimi, qalib gəlmək istəyirdik. Ola bilsin, itkilər oyun planında özünü göstərirdi deyə belə düşünürsünüz.
- Fasilədə əvəzlənməyin nə ilə bağlı idi?
- Pis oynadım, çox pis.
- Millidən qayıtmağınla bağlı ola bilər?
- Nədən asılı olduğunu deyə bilmərəm. Onu bilirəm ki, pis oynadım, ümidləri doğrultmadım.
HƏBİB
