Polşa xəstəxanalar və su təchizatı sistemləri də daxil olmaqla kritik infrastruktura gündəlik onlarla kiberhücumlarla üzləşir və Varşava bunu rus hakerlərinin üzərinə qoyur.
HİT.az xəbər verir ki, bu barədə "Financial Times"a müsahibəsində rəqəmsal texnologiyalar nazirinin müavini Dariuş Standerski bildirib.
Standerskinin sözlərinə görə, Rusiya ilə davam edən gərginlik fonunda Polşanın xəstəxanaları və kommunal sistemləri gündə 20-50 kiberhücuma məruz qalır. Əksəriyyəti uğurla dəf edilsə də, "əsasən" xəstəxanaları hədəf alan bəzi insidentlər tibb müəssisələrinin müvəqqəti bağlanması və tibbi məlumatların oğurlanması ilə nəticələnib.
Artan təhlükəyə cavab olaraq, Polşa kibertəhlükəsizlik üçün maliyyələşdirməni əhəmiyyətli dərəcədə artırır, keçən il 600 milyon avrodan 2025-ci ildə görünməmiş 1 milyard avro ayırmağı planlaşdırır. Varşava rəsmiləri iddia edirlər ki, Polşa Rusiya kiberhücumlarının Avropa İttifaqında əsas hədəfidir, baxmayaraq ki, ölkə bu cəhdlərin təxminən 99%-nə qarşı çıxa bilir.
Keçən ay Rusiyanın dəstəklədiyi iddia edilən böyük bir kiber əməliyyat Polşanın on ən böyük şəhərindən birində su təchizatını pozmağa cəhd etdi. Bu hadisə 2022-ci ildə SVO-nun fəaliyyətə başlamasından bəri ən ciddi hücumlardan biri idi. Standerski təhlükəsizlik səbəbi ilə şəhərin adını çəkməkdən imtina etdi, lakin hakerlərin obyektin İT şəbəkəsinə nüfuz etdiyini təsdiqlədi. Lakin onlar su təchizatını kəsə bilməmiş dayandırılıblar.
Buna cavab olaraq hökumət su sistemlərinin kibertəhlükəsizliyini gücləndirmək üçün sentyabrda 80 milyon avro ayıracaq. Bu, Polşanın 2400 yerli administrasiyasının sistemləri də daxil olmaqla, ictimai infrastrukturun qorunması üzrə daha geniş təşəbbüsün bir hissəsidir.
Samir
