Xalq qazeti portalından əldə olunan məlumata əsasən, ain.az xəbər verir.
Onu yazanlardan biri Xankəndidə asayiş keşikçisidir
2023-cü il sentyabrın 19–20-də erməni separatçılarının Qarabağda törətdikləri genişmiqyaslı təxribatların qarşısının alınması, Ermənistan silahlı qüvvələri birləşmələrinin tərk–silah edilərək ərazilərimizdən çıxarılması məqsədilə bölgədə həyata keçirilən lokal xarakterli antiterror tədbirləri Azərbaycan Prezidenti, Ali Baş Komandan İlham Əliyevin rəhbərliyi ilə şanlı Azərbaycan Ordusunun zəfər yürüşünü tamamlayan parlaq qələbə oldu.
Cəmi 1 sutka davam etsə də, tarixi qəhrəmanlıqlar sırasına qızıl hərflərlə yazılmış bu əməliyyat zamanı xarici havadarlarının dəstəyi ilə uzun illər boyu “təpədən-dırnağa” silahlanmış ermənilərin ön xətdə və dərinlikdə yerləşən əksər mövqeləri, davamlı atəş nöqtələri, döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarıldı. Müqavimət göstərə bilməyəcəyini, məğlubiyyətin labüd olduğunu anlayan düşmən ağ bayraq qaldıraraq təslim oldu, Qarabağda erməni separatizminə həmişəlik son qoyuldu.
Azərbaycanın ərazi bütövlüyü və suverenliyi müqəddəs torpaqlarımızın azadlığını canından əziz bilən igid oğullar sayəsində bərpa edilibdi. Belə Vətən övladlarından biri, Ağcabədi rayon sakini Rəşad Quliyev uğrunda döyüşdüyü azad Qarabağda yenə də xidmətini davam etdirir. Bu dəfə isə Daxili İşlər Nazirliyinin əməkdaşı, Xankəndi Polis Şöbəsinin polis nəfəri kimi. Antiterror tədbirlərinin ikinci ildönümü günündə onunla asayiş keşikçisi olduğu Xankəndidə görüşdük, həyatı və keçdiyi döyüş yolu haqqında “Xalq qəzeti”nə danışdı.
Öyrəndik ki, Rəşad 2000-ci ildə Ağcabədi rayonunun Aşağı Qiyaməddinli kəndində doğulub. Orta məktəbi bitirdikdən sonra həqiqi hərbi xidmətini Tovuz rayonundakı “N” saylı hərbi hissədə keçib. 2020-ci ildə ordu sıralarından tərxris olunsa da, hərbi xidmətə olan marağı, Qarabağda xuntanın cinayətləri onu yenidən ordu sıralarına qaytarıb. Bu dəfə müddətdən artıq xidmət edən (MAXE – M.R.) hərbi qulluqçu kimi xidmətə başlayan Ruslan 2021-ci ildə peşəkarlığını artırmaq üçün qardaş Türkiyədə komando kurslarına göndərilib. Kursları müvəffəqiyyətlə bitirdikdən sonra Vətənə qayıdaraq kiçik çavuş rütbəsində xidmətini davam etdirib.
Döyüş yolu 2022-ci il martın 26-da Xocalı istiqamətində qeyri-qanuni erməni silahlı dəstələrinin təxribatlarının qarşısının alınması məqsədilə həyata keçirilmiş Fərrux əməliyyatı ilə başlayıb. Məlum olduğu kimi, həmin uğurlu əməliyyat nəticəsində Xocalı rayonunun Fərrux kəndi işğaldan azad olunmuş, eyniadlı dağın ətrafındakı mühüm yüksəkliklər nəzarətə götürülmüşdü.
Daha sonra, yenə 2022-ci ilin 12-14 sentyabrında Azərbaycan-Ermənistan şərti sərhədində Ermənistanın silahlı qüvvələrinin davamlı təxribat cəhdləri səbəbindən baş verən Sentyabr döyüşlərinin də iştirakçısı olmuş Rəşad üçün ömrünün ən yaddaqalan, həyəcanlı və qürurverici anları isə antiterror tədbirlərində keçdiyi döyüş yoludur.
Həmsöhbətimiz o günləri belə xatırladı:
– Əlbəttə, Vətən müharibəsində qazandığımız şanlı qələbə nəticəsində uzun illər boyu torpağımıza göz dikmiş mənfur düşmən layiqli cəzasını almışdı. Ancaq Qarabağda hələ də separatçılar var idi və bu, belə davam edə bilməzdi. Ona görə də Ali Baş Komandanımızın əmrinə uyğun olaraq, ərazi bütövlüyümüzün və suverenliyimizin tam təmin edilməsi məqsədilə antiterror tədbirlərinin keçirilməsi hər bir azərbaycanlının ürəyindən xəbər verdi.
Fəxr edirəm ki, mən də həmin döyüşlərin iştirakçısı olmuşam. Biz Ağdərə istiqamətində döyüşürdük. Hamımızda sonsuz ruh yüksəkliyi vardı. Sanki atışmaya, təhlükəyə, savaşa deyil, toy-bayrama gedirdik. Ürəyimizdə Vətən eşqi, torpaq sevgisi o qədər güclü idi ki, hamı özünü irəli atır, hər kəs daha öndə döyüşmək istəyirdi!
Sentyabrın 20-də, antiterror tədbirlərinin sona çatmasına az qalmış, özünün dediyi kimi, yüngül yaralanan qəhrəmanımız növbəti qələbə xəbərinə hospitalda sevinib. Onun Vətən naminə xidmətləri dövlətimiz tərəfindən layiqincə qiymətləndirilib, “Şücaətə görə” medalı ilə təltif edilib. Rəşad uğrunda döyüşdüyü azad Qarabağda, Xankəndidə yaşayır, burada polis əməkdaşı kimi çalışır.
Şanlı əməliyyatın ildönümündə o bildirdi ki, taleyinə yazılmış, yeri-göyü lərzəyə salan o döyüşdə iştirakından qürur duyur:
– Qarabağın havası, suyu, təbiəti möcüzədir. Xoşbəxtəm ki, azadlığı uğrunda döyüşdüyüm torpaqlarda polis əməkdaşı kimi xidmətimi davam etdirirəm. Polis səngərsiz əsgərdir. Bu mənada Qarabağda asayişin keşiyində dayanmaq mənim üçün növbəti Vətən borcudur. Vətən borcu isə bitən deyil...
Həqiqətən də işğaldan azad edilmiş ərazilərdə polis kimi çalışmaq, qanunçuluğun keşiyində dayanmaq, hüquqi dövlət və konstitusiya prinsiplərinin bərqərar olunmasında iştirak etmək qürurverici olduğu qədər də, məsuliyyətli və şərəfli işdir. Söhbətimizin qəhrəmanı Rəşad Quliyevin timsalında bu şərəfli yolda gecə-gündüz demədən məsuliyyətlə, Vətən sevgisi ilə addımlayanların hamısına uğurlar arzulayırıq.
Mahir RƏSULOĞLU,“Xalq qəzeti”nin Qarabağ müxbiriXankəndi
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
