20 sentyabr 2025-ci il tarixdə Konstitusiya və Suverenlik ili çərçivəsində Xətai rayonunda mühüm mədəni hadisə baş tutdu. Xətai Rayon İcra Hakimiyyətinin, “Mirvarid Dilbazi Poeziya Məclisi” İctimai Birliyinin və “Kəlağayı Ev Muzeyi”nin təşkilatçılığı ilə Heydər Əliyev adına istirahət parkının amfiteatr səhnəsində “II Kəlağayı Festivalı” keçirildi.
Festival çərçivəsində sərgi ilə tanışlıq, rəsmi açılış mərasimi və geniş konsert proqramı təqdim olundu. Tədbirdə rayon İcra Hakimiyyətinin rəhbərliyi, digər dövlət qurumlarının nümayəndələri, tanınmış incəsənət və ədəbiyyat xadimləri, aşıqlar, şairlər, media təmsilçiləri və çoxsaylı sakinlər iştirak etdilər.
Rəsmi hissədə “Mirvarid Dilbazi Poeziya Məclisi”nin sədri, “Kəlağayı Ev Muzeyi”nin direktoru Güllü Eldar Tomarlı tədbiri açaraq festivalın əhəmiyyətindən danışdı. Xətai Rayon İcra Hakimiyyətinin birinci müavini Etibar Əhmədov və şöbə müdiri Pənah İmanov, Milli Məclisin deputatı, Naxçıvan Rəssamlar İttifaqının sədri Ülviyyə Həmzəyeva, əmək qəhrəmanı, Prezident təqaüdçüsü Tərlan Musayeva və filologiya üzrə fəlsəfə doktoru Almara Nəbiyeva çıxış edərək kəlağayının milli kimliyimizdəki əhəmiyyətini və belə tədbirlərin vacibliyini vurğuladılar.
Festival çərçivəsində zəngin sərgi proqramı da təqdim olundu. Sərginin açılışını Güllü Eldar Tomarlı edərək eksponatları iştirakçılara təqdim etdi. Tədbirdə Sosial Xidmətlər Agentliyinin Əlilliyi olan şəxslərin Peşə-əmək Reabilitasiyası Mərkəzində təhsil alan gənclərin əl işləri nümayiş etdirildi. Quramaçı sənətkarlar Ella Bağırova, Aybəniz Camalova, Asif Qasımov, Viktoriya İsmayılova və Könül Hüseynovanın əsərləri, eləcə də Şəki və Basqal kəlağayıları iştirakçılara təqdim olunaraq satışa çıxarıldı. Bundan başqa, Güllü Eldar Tomarlının yaratdığı “Kəlağayı Ev Muzeyi”nin əsrlərə söykənən 200 qədim kəlağayısı, dekorativ-tətbiqi sənət nümunələri və kəlağayı mövzusunda nəşrlər sərgi iştirakçılarının xüsusi marağına səbəb oldu.
Konsert proqramı da rəngarəng çıxışlarla yadda qaldı. Əvvəlcə Sosial Xidmətlər Agentliyinin Peşə-əmək Reabilitasiyası Mərkəzinin eşitmə və nitq məhdudiyyətli gəncləri Azərbaycan Respublikasının Dövlət Himnini əl işarələri ilə ifa edərək alqışlarla qarşılandılar. Daha sonra şəhid Ramil Yusifzadənin anası Reyhan Yusifova “Qələbə” mahnısını ifa etdi. Şəki Uşaq İncəsənət Məktəbindən xoreoqraf Xumar Əsədovanın rəqs qrupu “Naxçıvani” və “Arşın mal alan” filmindən rəqs nömrələri təqdim etdi. Əməkdar Mədəniyyət işçisi Aşıq Solmaz Kosayeva, “Səma” rəqs qrupu, bəstəkar və müğənni Arif Mehmandost, vokal müəllimi Fərqanə Salamova, “Nənə qızlar” ansamblı, müğənnilər İnci Şirvanlı, Uğur Şirvanlı, Nigar Ağdamlı, İntizar Bahardoğan, Həsən Həsənli, aşıqlar Rəvanə Lerikli, Aşıq Həqiqət, Nərmin Cəlal, şair Brilyant Atəş müxtəlif çıxışlarla festival iştirakçılarına unudulmaz anlar yaşatdılar.
Xatırladaq ki, kəlağayı 2014-cü ildə Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilmiş və beynəlxalq səviyyədə tanıdılmışdır. Bu əlamətdar hadisənin 10 illik yubileyi münasibətilə 2024-cü ildə keçirilmiş “I Kəlağayı Festivalı” Xətai rayonunda başlanaraq, ölkəmizin müxtəlif bölgələrində və xaricdə uğurla davam etdirilmişdir.
“II Kəlağayı Festivalı” tamaşaçılar tərəfindən böyük rəğbətlə qarşılandı və milli-mənəvi dəyərlərimizin təbliği, qeyri-maddi mədəni irsimizin qorunması və gələcək nəsillərə çatdırılması istiqamətində mühüm mədəni hadisə kimi yadda qaldı.
