Gəncə Apellyasiya Məhkəməsində torpaq üzərində mülkiyyət, istifadə və ya icarə hüququnu pozmada təqsirləndirilən Hacı Məcidzadənin (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Salman Hüseynovun sədrliyi ilə keçirilən prosesdə qərar elan olunub.
Qərara əsasən, apellyasiya protesti qismən təmin edilib, təqsirləndirilən şəxsin 188.2-ci (torpaq üzərində mülkiyyət, istifadə və ya icarə hüququnu pozma) maddəsi ilə məhkum edilməsinə dair Gədəbəy Rayon Məhkəməsinin 12 iyun 2025-ci il tarixli cəzaya aid hissədə dəyişdirilib. Onun üzərinə yaşayış yerini saat 22:00-dan saat 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, Gədəbəy rayonu ərazisi hüdudlarını tərk etməmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş yerinin dəyişdirilməsi barədə əvvəlcədən məlumatlandırmaq vəzifələri qoyulub.
İttihama görə, Hacı Məcidzadə 2023-cü ilin yay aylarından dekabr ayınadək olan müddətdə, istintaq zamanı dəqiq müəyyən edilməmiş tarixdə, qanunla müəyyən edilmiş mülkiyyət, istifadə və icarə hüququ olmadan Gədəbəy rayonu, Arıqdam kəndində yaşadığı evin yaxınlığında yerləşən, sözügedən kənd bələdiyyəsinin mülkiyyətində olan, yaşayış məntəqələri torpaqları kateqoriyasına aid 240 kvadrat metr torpaq sahəsini özbaşına ələ keçirib. Təqsirləndirilən şəxs həmin torpaq sahəsində aidiyyəti dövlət orqanlarının müvafiq qaydaları kobud surətdə pozaraq, heç bir müvafiq icazə almadan tikinti işlərinə başlayıb.
Belə ki, o, bələdiyyəyə məxsus torpaq sahəsində qum və daş materiallarından istifadə etməklə, qanunsuz şəkildə ümumi sahəsi 230.1 kvadrat metr olan, 7,8 metr enində və 29,5 metr uzunluğunda tövlə inşa etdirib. Nəticədə təqsirləndirilən şəxs qanunvericiliklə müəyyən edilmiş mülkiyyət, istifadə və ya icarə hüququ olmadan bələdiyyənin yaşayış məntəqələri torpaqları kateqoriyasına aid torpaq sahəsində özbaşına tikinti işləri aparmaqla qanunsuz hərəkətlər edib.
Gədəbəy Rayon Məhkəməsinin hökmü ilə Hacı Məcidzadəyə 1 il müddətə azadlığın məhdulaşdırılması (elektron qolbaq) cəzası təyin edilib.
Kamal Məmmədov
