BAKI, 22 sentyabr. TELEQRAF
Bu gün “France Football” jurnalı 2024/25 mövsümünün dünyanın ən yaxşı futbolçusu üçün "Qızıl top" mükafatının təqdimetmə mərasimini keçirəcək.
Teleqraf xəbər verir ki, Parisdəki “Şatle” teatrında təşkil olunacaq mərasim Bakı vaxtı ilə 22:00-da başlayacaq.
Bu, ikinci dəfədir ki, "Qızıl top" Avropa Futbol Assosiasiyaları İttifaqı (UEFA) ilə birgə təqdim olunacaq. 2010-cu ildən 2015-ci ilə qədər mükafatı “France Football” Beynəlxalq Futbol Federasiyası (FIFA) ilə birgə təqdim edib.
Ötən il "Qızıl top"u İngiltərənin "Mançester Siti" klubunun ispaniyalı yarımmüdafiəçisi Rodri qazanıb.
Qaliblərin Seçilmə Prosesi
"Qızıl top" fərdi çıxışlar, komanda nailiyyətləri və ədalətli oyun əsasında ən yaxşı kişi və qadın futbolçulara verilir. Münsiflər heyəti FIFA-nın kişilər üzrə reytinqində ilk 100, qadınlar üçün isə ilk 50 ölkədən olan ixtisaslaşmış jurnalistlərdən ibarətdir. Hər bir münsif üzvü 30 namizəd arasından xallara görə azalan sıra ilə 10 oyunçu seçir. Bir neçə namizəd arasında bərabərlik olarsa, ən çox birinci yeri tutan qalib gəlir.
Kişilər arasında mükafata iddialıların yekun siyahısına Cud Bellingem, Kilyan Mbappe, Vinisius Junior (hamısı İspaniyanın "Real Madrid" klubundan), Usman Dembele, Dezire Due, Aşraf Hakimi, Xviça Kvaratsxeliya, Fabian Ruis, Nunu Mendeş, Vitinya və Joau Neveş (hamısı Fransanın PSJ klubundan), Harri Keyn ilə Maykl Olise (hər ikisi Almaniyanın "Bavariya" klubundan), Robert Levandovski, Pedri, Lamin Yamal və Rafinya (hamısı İspaniyanın "Barselona" klubundan), Florian Virts, Aleksis Mak Allister, Məhəmməd Salah, Vircil van Deyk (hamısı İngiltərənin "Liverpul" klubundan), Denzel Dümfris, Lautaro Martines (hər ikisi İtaliyanın "İnter" klubundan), Seru Girassi (Almaniyanın "Borussiya Dortmund" klubundan), Viktor Dyökereş, Deklan Rays (hər ikisi İngiltərənin "Arsenal" klubundan), Koul Palmer (İngiltərənin "Çelsi" klubundan), Erlinq Holand və Canluici Donnarumma (hər ikisi İngiltərənin "Mançester Siti" klubundan), eləcə də Skott Maktominey (İtaliyanın "Napoli" klubundan) daxildir.
Digər Nominasiyalar
2018-ci ildən təşkilatçılar digər nominasiyalar üzrə də mükafatlar təqdim edirlər. O vaxtdan bəri qadın futbolçular da "Qızıl top"a namizəd olurlar. Keçən il mükafat "Barselona"lı Aytana Bonmatiyə verilib. O və Aleksiya Putelyas bu mükafatı iki dəfə qazanıblar. Bu il həm Bonmati, həm də Putelyas da namizəddirlər.
Ötən mövsümün ən yaxşı qapıçısı SSRİ yığmasının keçmiş futbolçusu, "Qızıl top"u qazanan yeganə qolkiper Lev Yaşinin adını daşıyan mükafatı alacaq. Ötən il mükafatı ardıcıl ikinci dəfə İngiltərənin “Aston Villa” klubunun argentinalı futbolçusu Emilyano Martines qazanıb. O, bu il Donnarumma, Alisson Bekker ("Liverpul", İngiltərə), Yassin Bunu ("Əl-Hilal", Səudiyyə Ərəbistanı), Lüka Şevalye (PSJ, Fransa), Tibo Kurtua ("Real Madrid", İspaniya), Yan Oblak ("Atletiko Madrid", İspaniya), David Raya ("Arsenal", İngiltərə), Mats Sels ("Nottingem Forest", İngiltərə) və Yann Zommerlə ("İnter", İtaliya) yarışacaq. Bu il ilk dəfə olaraq qadın futbolunun qapıçıları da mükafatlandırılacaq.
Həmçinin 21 yaşadək ən yaxşı futbolçuya (kişi və qadın) təqdim olunan Raymon Kopa, ən yaxşı baş məşqçiyə (kişi və qadın) verilən Yohan Kroyff mükafatlarının da sahibi bilinəcək. Mərasimdə mövsümün ən yaxşı kişi və qadın komandaları, ən yaxşı bombardiri və futboldankənar fəaliyyətə görə təqdim olunan Sokrates mükafatının da təqdim olunması planlaşdırılır.
Qeyd edək ki, "Qızıl top"u “France Football”un keçmiş baş redaktoru Qabriel Hano təsis edib. Mükafat ilk dəfə 1956-cı ildə İngiltərə "Blekpul"unun hücumçusu Stenli Metyuza təqdim edilib.
