Hindistan texnologiya şirkətlərinin səhmləri ABŞ prezidenti Donald Trampın ixtisaslı xarici işçilər üçün H-1B vizası ərizələrinin baxılması üçün 100 000 dollarlıq rüsum tətbiq edən fərmanı imzalaması fonunda ucuzlaşıb, bu barədə “Bloomberg” məlumat yayıb.
Qeyd olunur ki, bu rüsum Hindistan şirkətlərinin, xüsusilə də gəlirlərinin əhəmiyyətli hissəsini ABŞ-dən əldə edən “Tata Consultancy Services” (TCS) və “Infosys” kimi İT xidmətləri təchizatçılarının layihələrini poza bilər. TCS-in səhmləri 3.4%, “Infosys”in səhmləri isə 3.9% ucuzlaşıb. Texnologiya şirkəti “Tech Mahindra”nın səhmləri 6.5% geriləyib.
Agentliyin analitikləri hesab edirlər ki, kiçik İT şirkətləri vizalardan daha çox asılı olduqları üçün iri firmalara nisbətən daha çox zərər görə bilərlər.
20 sentyabrda Tramp ixtisaslı xarici işçilər üçün H-1B vizası ərizələrinin baxılması üçün 100 000 dollarlıq rüsum tətbiq edən fərmanı imzalayıb. Fərman həmçinin fiziki şəxslər üçün 1 milyon dollar, şirkətlər üçün isə 2 milyon dollarlıq ödəniş müqabilində vizanı sürətlə əldə etməyə imkan verən “Qızıl kart” proqramını nəzərdə tutur. Bu tədbirlər immiqrasiyanı məhdudlaşdırmaq və amerikalı işçilərin işə götürülməsini stimullaşdırmaq məqsədi daşıyır.
H-1B vizası üç il müddətinə verilir. Hər il 65 000 belə viza verilir, ABŞ ali təhsil müəssisələrinin elmi dərəcəyə malik məzunları üçün əlavə 20 000 yer ayrılır. Çox vaxt H-1B vizaları ABŞ-də yüksək texnologiyalar sahəsi ilə bağlı olur. Böyük və kiçik texnologiya şirkətlərinin məlumatına görə, H-1B proqramı onlara öz ölkələrində tapa bilmədikləri ixtisaslı mütəxəssisləri işə götürmək üçün lazımdır.
