Ukrayna Müdafiə Nazirliyinin Baş Kəşfiyyat İdarəsi Ukrayna müdafiə qüvvələrinin ilhaq edilmiş Krımda Rusiyaya məxsus iki An-26 təyyarəsini vuraraq yandırdığını bildirib.
Departament bildirib ki, yarımadaya reyd zamanı Ukrayna hərbi kəşfiyyatının xüsusi təyinatlı qüvvələri Rusiyanın iki An-26 nəqliyyat təyyarəsini yandırıb, həmçinin yerüstü radar stansiyasını və MR-10M1 Mais M1 sahil radarını məhv edib.
HGA əlavə edib ki, bu itkilər Ukrayna Silahlı Qüvvələrinin Baş Qərargahının 24 sentyabr tarixli hesabatında qeyd olunub.
An-26 turbovintli çoxməqsədli nəqliyyat təyyarəsidir. Açıq mənbələrin məlumatına görə, o, yüksək sabitlik, idarəetmənin asanlığı, sadə pilotlaşdırma texnikası və pilot kabinəsindən yaxşı görünmə qabiliyyəti ilə xarakterizə olunur.
Daha əvvəl bildirilmişdi ki, cümə axşamı, sentyabrın 25-də Ukrayna müdafiə qüvvələri Zaporojya vilayətində Rusiyanın Su-34 təyyarəsini vurub.
