Ajans.az xəbər verir ki,o,2007-ci il prezident seçkiləri kampaniyasını Liviya rejimindən qeyri-qanuni maliyyələşdirməyə dair cinayətkar sui-qəsddə təqsirli bilinib. Məhkəmənin qərarından sonra Sarkozi jurnalistlərə bildirib:
“Həbsxanada başım dik yatacağam.” 70 yaşlı keçmiş lider korrupsiya və qeyri-qanuni seçki kampaniyasının maliyyələşdirilməsi də daxil olmaqla digər ittihamlardan bəraət alıb. Lakin məhkəmə onun yaxın ətrafının mərhum Liviya diktatoru Müəmmər Qəddafinin rejimindən maliyyə dəstəyi almağa cəhd etdiyini əsas gətirərək, onu əsas ittiham üzrə günahkar sayıb. Bu, Fransa tarixində ilk dəfədir ki, keçmiş prezident xarici dövlətdən gizli maliyyə dəstəyi almağa cəhddə rəsmi şəkildə təqsirli bilinib. Sarkozi hökmü "qanunun aliliyi baxımından son dərəcə ciddi" adlandıraraq qərardan apellyasiya şikayəti verəcəyini açıqlayıb. Buna baxmayaraq, hökm qüvvədə qaldığı halda keçmiş prezident mütləq həbsdə vaxt keçirməli olacaq — bu isə müşahidəçilərin gözlədiyindən daha sərt cəzadır. Məhkəmə, prokurorların keçmiş dövlət başçısını həbsxanaya nə vaxt təhvil verəcəklərini müəyyənləşdirmələri üçün bir aylıq möhlət tanıyıb. Bu qərarla Sarkozi məhkəmə zalından dərhal polis müşayiəti ilə həbsxanaya aparılmaqdan xilas olub. Sarkoziyə qarşı irəli sürülən ittihamlar 2011-ci ildə yayılan məlumata əsaslanır. O zaman Liviya dövlət agentlikləri və Qəddafinin özü Fransa seçkilərinə milyonlarla avro vəsaitin gizli şəkildə ötürüldüyünü iddia etmişdi. 2012-ci ildə Mediapart araşdırma saytı Liviya kəşfiyyatının 50 milyon avro dəyərində maliyyələşdirmə müqaviləsinə dair sənəd dərc etmişdi. Sarkozi həmin sənədi saxta adlandırmış və böhtan iddiası ilə məhkəməyə müraciət etmişdi. Müstəntiqlər həmçinin onun 2005–2007-ci illərdə daxili işlər naziri vəzifəsində çalışarkən yaxın ətrafının Liviyaya etdiyi səfərləri də araşdırıblar. 2016-cı ildə franko-livanlı iş adamı Ziad Takieddine Mediapart-a bildirib ki, Tripolidən nağd pullarla dolu çamadanlar Fransa Daxili İşlər Nazirliyinə çatdırılıb. Takieddine sonradan bu ifadəsini geri götürsə də, məhkəmə onun ilkin bəyanatını və digər sübutları əsas götürərək hökm çıxarıb. Sarkozi məhkəmə zalına həyat yoldaşı — müğənni və model Karla Bruni-Sarkozi, eləcə də üç yetkin oğlu ilə birlikdə daxil olub. Zalda jurnalistlər və ictimaiyyət nümayəndələri də iştirak edib. Karla Bruni hökmün elan edildiyi anda şoka düşmüş vəziyyətdə görünüb. Hüquqi qalmaqallara baxmayaraq, Nikola Sarkozi Bruni ilə nikahı və siyasi dairələrdəki əlaqələri səbəbilə hələ də Fransanın sağçı düşərgəsində və ictimaiyyət arasında nüfuzlu fiqur olaraq qalır.

 

• Korrupsiya
• Maliyyələşdirmə
• Həbsxana
• Prezident Seçkiləri
• Nikola Sarkozi