UEFA-nın əksər üzvləri İsrailin futbol klublarının və milli komandasının təşkilatın rəsmi turnirlərindən uzaqlaşdırılmasını dəstəkləyir. Qərarın gələn həftə veriləcəyi gözlənilir.
Sportinfo.az xəbər verir ki, bu barədə “The Times” nəşri məlumat yayıb.
İsrailə qarşı mümkün sanksiyaların əsas səbəbi ölkənin hazırda Qəzzada davam etdirdiyi hərbi əməliyyatlardır.
UEFA sanksiya tətbiq edərsə, İsrail milli komandası 2026-cı il dünya çempionatının seçmə mərhələsində iştirak edə bilməyəcək.
Bununla yanaşı, ölkənin klubları da UEFA-nın rəsmi turnirlərindən, həmçinin, Çempionlar Liqası, Avropa Liqası və Konfrans Liqasından kənarda qalacaqlar.
Bir gün öncə ABŞ tərəfinin UEFA-nın İsraili turnirlərdən kənarlaşdırmasına mane olmağa çalışdığına dair məlumatlar yayılmışdı.
