Təklif gələn həftə Kopenhagendə keçiriləcək danışıqların əsas gündəm mövzusu olacaq...
Poliqon xəbər verir ki, Avropa Komissiyası Ukraynaya dəstək məqsədilə dondurulmuş Rusiya aktivlərindən istifadə etməklə 140 milyard avro məbləğində kredit ayrılmasını təklif edib. Politico nəşri yazır ki, bu barədə sənəd Avropa İttifaqına üzv dövlətlərə təqdim olunub və məsələ bu gün səfirlər səviyyəsində keçiriləcək iclasda müzakirəyə çıxarılacaq.
Mənbələr bildirirlər ki, təşəbbüs Aİ liderlərinin gələn həftə Kopenhagendə keçirəcəyi sammitdə geniş müzakirə ediləcək və Ukraynaya maliyyə dəstəyi ilə bağlı yeni mərhələnin əsasını qoya bilər.
Xatırladaq ki, bir gün əvvəl Almaniya kansleri Fridrix Merts oxşar təşəbbüslə çıxış etmişdi. O, belə bir kreditin Ukraynanın hərbi texnika alımlarının maliyyələşdirilməsi üçün istifadə edilməsinin vacibliyini vurğulamışdı.
Avropa Komissiyasının rəhbəri Ursula fon der Lyayen isə bundan əvvəl bəyan etmişdi ki, Aİ dondurulmuş Rusiya aktivlərini müsadirə etməyəcək, lakin onlardan əldə olunan gəlirləri Ukraynanın maliyyələşdirilməsinə yönəldəcək.
Müşahidəçilər hesab edirlər ki, Brüsselin bu addımı həm Avropanın Kiyevə dəstəyinin davamlılığını göstərir, həm də Rusiyanın maliyyə imkanlarını zəiflətməyə yönəlib. Təklifin qəbul olunacağı təqdirdə Ukrayna uzunmüddətli maliyyə sabitliyi baxımından mühüm dəstək qazana bilər.
Poliqon.info
