Ukrayna Silahlı Qüvvələrinin Baş Komandanı general Aleksandr Sırski bildirib ki, Rusiyanın Dnepropetrovsk vilayətinə ciddi və genişmiqyaslı hücum həyata keçirməyə gücü çatmır. Vətəninfo.az xəbər verir ki, bu barədə jurnalistlərlə görüşü zamanı danışıb.
Onun sözlərinə görə, Dnepropetrovsk vilayətində – xüsusilə Novopavlovsk istiqamətində – vəziyyət dinamik olaraq dəyişir. Bu bölgə Donetsk, Zaporojye və Dnepropetrovsk vilayətlərinin inzibati sərhədlərinin qovşağında yerləşir və geniş əraziləri əhatə edir. Hər iki tərəfdə qüvvələrin sıxlığı kifayət qədər deyil, lakin rus qoşunlarının sayı bir qədər çoxdur.
“Buna baxmayaraq, onların Ukrayna müdafiəsini sürətlə yarmaq və irəliləmək üçün nə kifayət qədər qüvvəsi, nə də vasitəsi var. Hazırda düşmən ‘min kəsik’ taktikası ilə, yəni kiçik hücumlarla, mövqelərimizi sarsıtmağa çalışır”, – deyə Sırski vurğulayıb.
Baş komandan əlavə edib ki, Rusiya Sumı istiqamətindən Novopavlovsk istiqamətinə dəniz piyadaları bölmələrini köçürüb və məqsədi ya Zaporojyeyə, ya da Dnepropetrovsk vilayətinə doğru irəliləmək olub. Lakin Ukrayna tərəfinin fəal əməliyyatları nəticəsində bu hücum cəhdi puç edilib.
“Hazırda Rusiya dəniz piyadaları Dobropolye istiqamətində döyüşlərə ‘bataq’ olub. Onlar irəliləyə bilmir”, – deyə general qeyd edib.
Hərbi analitik Denis Popoviç bildirib ki, Donetsk, Zaporojye və Dnepropetrovsk vilayətlərinin sərhəd bölgəsində rus qoşunları artıq Dnepropetrovsk vilayətinin bəzi hissələrinə sızmağa nail olub. Onlar “sızma və infiltrasiya” taktikası ilə irəliləməyə çalışırlar ki, bu da Ukrayna qüvvələri üçün ciddi problem yaradır.
Hərbi ekspertin sözlərinə görə, bu istiqamətdə düşmənin qarşısını almaq üçün Ukrayna Müdafiə Qüvvələrinə kifayət qədər piyada qüvvəsi çatmır.
Müdafiə Strategiyaları Mərkəzinin eksperti Viktor Kevlyuk isə qeyd edib ki, Rusiya uzun müddət ərzində Donbasdakı əsas “qalaları” – Toretsk, Pokrovsk və Çasov Yar kimi şəhərləri ələ keçirə bilməyib. Onun fikrincə, belə möhkəmləndirilmiş mövqeləri tutmaq üçün hazırlıqlı hücum qüvvələri lazımdır və hazırda Rusiyada bu cür piyada bölmələri çatışmır.
