Stokholm, 27 sentyabr, Nərgiz Cəfərli, AZƏRTAC
İsveç silahlı qüvvələri müdafiə büdcəsinin 2022-ci ildəki 75 milyard krondan bu il 143 milyard krona çatdırılmasına baxmayaraq, əsgərlərin uniforma və təchizatla təmin edilməsində ciddi problemlərlə üzləşməkdə davam edir.
AZƏRTAC xəbər verir ki, həm kişilərə, həm də qadınlara uyğun yeni standartlaşdırılmış forma komplektini tətbiq etmək mümkün olmayıb. Ordu həddindən az böyük ölçü və həddindən çox kiçik ölçü sifariş edib. Bu, artıq çatdırılmada ikinci dayandırmadır.
Problemlər ayaqqabılara da aid olub. Satınalmanın təcili olduğundan keyfiyyətsiz botinkalar alınıb və onlar tezliklə yararsız hesab edilib. Qadın hərbçiləri indiyə qədər zəruri əsas geyimlə təmin olunmayıblar – çağırışçıların bir qismi pul kompensasiyalarından istifadə edərək paltarı almağa məcbur olurlar.
Hərbi Xidmətə Çağırış Şurası bu nöqsanlara görə ordunu dəfələrlə tənqid edib və payızda onlara nəzarəti davam etdirməyi planlaşdırır. Silahlı qüvvələrin rəhbərliyi çatışmazlıqları etiraf edir, lakin onların aradan qaldırılması üzrə işin aparıldığını vurğulayır. Xüsusilə, qadın zabitlərə ilk dəfə olaraq yeni geyim formasının elementlərinin, o cümlədən yubkanın hazırlanmasında iştirak etmək imkanı verilib.
