Mütəşəkkil, aktiv və həssas insanların ömrü daha uzun ola bilər, narahat və əsəbi insanların isə əksinə, daha qısa yaşama ehtimalı var.
Editor.az “The Guardian”a istinadla xəbər verir ki, Edinburq Universitetinin alimləri 22 mindən çox böyüklə bağlı məlumatı təhlil edərək bu qənaətə gəliblər.
Tədqiqatda iştirakçılar şəxsiyyət tiplərinə görə deyil, özlərini təsvir etmək üçün istifadə etdikləri sözlər əsasında qiymətləndirilib.
Araşdırma göstərib ki, “aktiv” və “enerjili” sözləri ənənəvi xarakter kateqoriyalarından daha güclü proqnozverici rol oynayır. Xüsusilə “aktiv” sözünü seçənlərin ölüm riski digər insanlara nisbətən 21 faiz daha az olub.
Mütəşəkkillik, çalışqanlıq və vicdanlılıq da uzunömürlülüklə müsbət əlaqələndirilib. Əksinə, “narahat”, “əhval-ruhiyyəli” və ya “tez əsəbiləşən” kimi xüsusiyyətlər isə daha erkən itkilərlə bağlı olub.
Alimlər bildirirlər ki, bu göstəricilər birbaşa səbəb-nəticə əlaqəsi yaratmır, lakin davranış tərzini formalaşdırır. Məsələn, mütəşəkkil insanlar sağlam həyat tərzini qorumağa daha çox diqqət yetirir, aktiv insanlar isə stresslə daha yaxşı mübarizə aparır.
Mütəxəssislər hesab edirlər ki, gələcəkdə bu cür fərdi xüsusiyyətlər tibbi yanaşmaların bir hissəsi ola bilər. Şəxsiyyət sorğuları standart sağlamlıq qiymətləndirməsini tamamlayaraq, əlavə dəstəyə ehtiyacı olan insanları müəyyən etməyə imkan verəcək.
//Gülnarə Abasova, Editor.az
