Rusiyanın “Russkiye Boyevyye Mashiny” (RBM) şirkəti tərəfindən hazırlanmış yeni “Legioner” yüngül zirehli maşını təqdim edilib.
“Poliqon” “Defence Blog” nəşrinə istinadən xəbər verir ki, 4×4 təkər formuluna malik bu vasitə, zirehsiz hərbi maşınlarla BTR-82A kimi zirehli transportyorlar arasında boşluğu doldurmağı nəzərdə tutur.
“Legioner”in xarici görünüşü sovet dövründən qalma BTR-40 və BTR-152 zirehli personal daşıyıcılarını xatırladır. O, Rusiya Quru Qoşunlarının Ukraynada və digər münaqişə zonalarında fəaliyyət göstərərkən müəyyən edilən qabiliyyət boşluğunu doldurmaq üçün dizayn olunub. Çünki Rusiyanın hazırkı texnika parkı minimal qorumaya malik yük maşınları və BTR-82A kimi tam zirehli personal daşıyıcılarına əsaslanır. “Legioner” isə bu ikisinin arasında yerləşməyi hədəfləyir.
4×4 şassiyə malik maşın, zirehli kabin və açıq yük platforması ilə təchiz olunub. Yük hissəsində təchizat daşına, döyüş olmayan bölgələrdə əsgərlər daşına və ya pulemyot üçün dəzgah quraşdırıla bilər. Təxminən 6.5 ton ağırlığında olan “Legioner”, 2.5 ton yük daşıma qabiliyyətinə və 750 kilometr əməliyyat radiusuna sahibdir. Maşını 200 at gücündə olan YaMZ-234 dizel mühərriki hərəkətə gətirir və bu, ona maksimum 100 km/saat sürətlə hərəkət imkanı verir.
