ain.az bildirir, Qafqazinfo portalına istinadən.
Gəncədə yeni fəaliyyətə başlayan “BakuBus” MMC-yə məxsus 11 nömrəli marşrut avtobusu ilə bağlı xoşagəlməz hal yaşanıb.
“Qafqazinfo” xəbər verir ki, bu barədə “Gencexeber” saytı məlumat yayıb. Yayılan videoda sərnişinlərin avtobusun qarşısını kəsməsi, avtobusa minə bilmədikləri üçün sürücüyə irad bildirərək arxa qapıdan minməsi görünür.
Şəhərin Sevinc (Məhsəti) qəsəbəsində fəaliyyət göstərən 11 nömrəli avtobusdan istifadə edən sərnişinlərin sözlərinə görə, avtobuslar arasında uzun intervallar nəqliyyat vasitələrində həddindən artıq sıxlıq yaradıb. Şikayətçilər bildirirlər ki, əvvəllər marşrutda köhnə avtobuslar işləsə də, onların hərəkət qrafikində belə problemlər müşahidə olunmayıb. Vətəndaşların iddiasına əsasən, onlar dayanacaqlarda saatlarla gözləməli olurlar.
Məsələ ilə bağlı “BakuBus” MMC-yə sorğu ünvanladıq. Müraciətimizə belə cavab aldıq: “Sosial şəbəkələrdə yayılan video görüntülərlə bağlı bildiririk ki, ötən gün Gəncə şəhərində “BakuBus” MMC-nin istismarında olan 11 nömrəli müntəzəm marşrut xətti üzrə hərəkət edən avtobuslardan birində Sevinc qəsəbəsi ərazisində sərnişinlə sürücü arasında insident baş verib. Hadisə zamanı qeyd olunan ərazidə rəsmi dayanacaq mövcud olmadığından sərnişinlər sürücüdən dayanacaqdan kənar saxlamasını tələb edib, lakin sürücü mövcud qaydalara əsasən bu tələbi yerinə yetirməyib.
Xüsusilə qeyd edirik ki, sürücü insidentə heç bir şəkildə qarışmayıb, sərnişinlərə qarşı kobudluq etməyib və tamamilə təmkinli davranaraq peşəkar mövqeyini nümayiş etdirib.
“BakuBus” MMC-nin istismarında olan avtobusların dayanacaqlardan kənar sərnişin endirmə və ya mindirmə səlahiyyəti yoxdur. Bu qaydalar sərnişinlərin təhlükəsizliyini və ictimai nəqliyyatın davamlı fəaliyyətini təmin etmək məqsədi daşıyır. Sərnişinlərdən xahiş edirik ki, avtobuslardan istifadə zamanı mövcud qaydalara riayət edərək yalnız rəsmi dayanacaqlardan istifadə etsinlər. “BakuBus” MMC sərnişin və sürücülərin təhlükəsizliyini daim prioritet hesab edir və oxşar halların qarşısının alınması üçün bütün lazımi tədbirləri görməkdədir.
Qeyd edək ki, “BakuBus” MMC Gəncə şəhərində 18 mövcud və 2 yeni marşrut xətti üzrə fəaliyyət göstərir. Şəhərə yüksək ekoloji standarta cavab verən 280 avtobus gətirilib ki, onlardan da 45-i 54, 186-sı 63, 49-u isə 102 sərnişin tutumuna malikdir.
Gülnar Əliyeva
Ən son xəbərləri və yenilikləri almaq üçün ain.az saytını izləyin.
