"Bu gün Danimarkanın paytaxtı Kopenhagen şəhərində "Avropa Siyasi Birliyi"nin 7-ci Zirvə toplantısının açılış mərasimi keçirilib. Zirvə görüşündə iştirak edən ölkə başçısı cənab Prezident İlham Əliyev toplantı çərçivəsində Ermənistanın Baş naziri Nikol Paşinyanla görüşüb".
Bu sözləri Sonxeber.az-a Milli Məclisin deputatı Müşfiq Cəfərov danışıb.
O, açıqlamasında qeyd edib ki, görüşdə tərəflər ABŞ Prezidenti Donald Trampın təşəbbüsü ilə keçirilmiş Vaşinqton Sülh Sammitində əldə olunan razılaşmaların əhəmiyyətindən də bəhs ediblər və hər iki dövlət başçısı Ermənistan və Azərbaycan arasında sülhün daha da möhkəmləndirilməsi istiqamətində səy göstərməyə hazır olduqlarını bir daha təsdiq ediblər:
"Prezidentlər həmçinin Azərbaycan ərazisində infrastrukturun inkişafı ilə bağlı cari işlərin gedişatı və Ermənistan ərazisində TRIPP layihəsini müzakirə ediblər, Vaşinqton Bəyannaməsinin icrası ilə bağlı fikir mübadiləsi aparıblar.
Ümumiyyətlə, ABŞ Prezidenti tərəfindən imzalanan Birgə Bəyannamə və paraflanan sülh sazişi təkcə Cənubi Qafqazın deyil, ümumilikdə dünyanın geosiyasi mənzərəsində ciddi dəyişikliklərə yol açıb. Görüş zamanı müzakirə edilən əsas məsələlərdən biri də "Beynəlxalq Sülh və Rifah naminə Tramp Marşrutu" – TRIPP layihəsidir ki, bu marşrut təkcə Cənubi Qafqazın deyil, ümumilikdə dünyanın geosiyasi mənzərəsində ciddi dəyişikliklərə yol açacaqdır.
Tərəflər həmçinin ATƏT-in Minsk prosesinin və onunla əlaqəli strukturların ləğv olunması ilə bağlı yekdilliklə qəbul edilmiş qərarın düzgünlüyünü və vacibliyini də qeyd ediblər.
Bütün bu görüşlər Cənubi Qafqazın iki dövlətinin gələcəyi baxımından müsbət çalarlar ifadə edir. Bəli, bəlkə də, bir neçə il bundan əvvəl Ermənistan rəhbərliyinin həllinin rədd edildiyi bu problemlərin aradan qaldırılması mümkünsüz idi. Bunu Azərbaycan Prezidenti cənab İlham Əliyevin diplomatiyası bacardı".
Vüsalə İbrahimli
