ABŞ diplomatları: Havana Rusiya işğalını dəstəkləyir və bu, beynəlxalq sanksiyalara ziddir...
Poliqon xəbər verir ki, ABŞ diplomatik mənbələrinin yaydığı məlumata əsasən, hazırda 1 mindən 5 minədək Kuba vətəndaşı Ukraynada Rusiya ordusunun tərkibində döyüşür. Mənbələr iddia edir ki, Kuba hökuməti bu prosesə birbaşa dəstək verir və Moskva ilə hərbi əməkdaşlığı dərinləşdirir.
Amerikalı diplomatlar bildiriblər ki, Kubanın Rusiya ilə bu səviyyədə əməkdaşlığı beynəlxalq hüququn prinsiplərinə ziddir və Ukraynadakı müharibəyə dolayı yolla dəstək deməkdir. Onların sözlərinə görə, Havanadakı hakimiyyət yalnız bu döyüşçülərin cəlb edilməsinə göz yummur, həm də logistik və təşkilati baxımdan Rusiyanın tərəfində çıxış edir.
Məlumatda qeyd olunur ki, bu iddialar BMT Baş Assambleyasının yaxın günlərdə keçiriləcək səsverməsi ərəfəsində səslənib. Səsvermədə ABŞ-ın Kuba üzərinə qoyduğu ticarət embarqosunun ləğvi ilə bağlı qətnamə layihəsi müzakirəyə çıxarılacaq. ABŞ tərəfi digər dövlətləri bu qətnaməyə qarşı səs verməyə çağırır və Kuba hökumətinin Rusiya ilə hərbi əlaqələrini arqument kimi göstərir.
Diplomatlar hesab edirlər ki, Havana Moskva ilə əməkdaşlıq edərək “müharibə cinayətlərinə şərik olur” və bu, beynəlxalq ictimaiyyətin Kubaya münasibətini köklü şəkildə dəyişməlidir. Onların fikrincə, embarqonun qaldırılması Kubaya əlavə maliyyə resursları qazandıracaq və bu vəsaitin bir hissəsi Rusiya ordusunun maraqlarına yönələ bilər.
Kuba hökuməti hələlik ABŞ iddialarına rəsmi cavab verməyib. Bununla belə, son aylarda Rusiyanın yüksək rütbəli nümayəndələrinin Havananı ziyarət etməsi və ikitərəfli hərbi-texniki əməkdaşlığın genişləndirilməsi barədə bəyanatlar iki ölkə arasında əlaqələrin intensivləşdiyini göstərir.
Poliqon.info
