Fransa lideri layihəni “həddindən artıq ümumi və qeyri-real” adlandırıb, İtaliya və Almaniya onun mövqeyini dəstəkləyib...
Avropa Komissiyasının sədri Ursula fon der Lyayen tərəfindən irəli sürülən “dron divarı” təşəbbüsü Avropa İttifaqının bir sıra liderləri, xüsusilə də Fransa prezidenti Emmanuel Makron tərəfindən sərt şəkildə tənqid olunub.
Poliqon xəbər verir ki, Financial Times qəzetinin məlumatına görə, Makron Kopenhagendə keçirilən Aİ sammitində çıxışı zamanı layihəyə ehtiyatla yanaşdığını bildirib və “çox ümumi terminlərə əsaslanan” bu cür təşəbbüslərin effektiv nəticə verməyəcəyindən narahat olduğunu vurğulayıb.
Fransa lideri həmçinin Avropanın müdafiə konsepsiyası baxımından “dəmir günbəzlər” və ya “dron divarları” kimi layihələrin real şəraitdə səmərəli işləməyəcəyini qeyd edib:
“Hər şey çox daha mürəkkəb və incə düşünülmüş yanaşma tələb edir”, deyə Makron bildirib.
Makronun bu fikirlərini İtaliyanın baş naziri Corciya Meloni və Almaniyanın müdafiə naziri Boris Pistorius da dəstəkləyiblər. Onların hər ikisi vurğulayıb ki, Avropa müdafiə sisteminin gələcəyi yalnız simvolik layihələrlə deyil, koordinasiyalı texnoloji əməkdaşlıqla təmin oluna bilər.
Fon der Lyayenin təqdim etdiyi “dron divarı” planı çoxsəviyyəli hava hücumundan müdafiə sisteminin yaradılmasını nəzərdə tutur. Layihə çərçivəsində təkmilləşdirilmiş aşkarlama və izləmə texnologiyaları, eləcə də innovativ və nisbətən ucuz dron əleyhinə sistemlər tətbiq edilməlidir. Bu təşəbbüs Avropa Komissiyasının müdafiə potensialı sahəsində ilk böyük layihəsi hesab olunur.
Mənbələrin məlumatına görə, “dron divarı” təşəbbüsü dörd əsas müdafiə prioritetindən biri kimi planlaşdırılıb. Digər istiqamətlərə sərhəd nəzarətinin gücləndirilməsi, hava və raket hücumundan müdafiə sistemlərinin təkmilləşdirilməsi və Avropanın peyk kəşfiyyatı və müşahidə imkanlarının genişləndirilməsi daxildir.
Ekspertlər qeyd edirlər ki, layihə üzv ölkələr arasında xərclərin bölüşdürülməsi, texnoloji suverenlik və NATO ilə koordinasiya məsələləri baxımından ciddi müzakirələr doğuracaq.
Poliqon.info
