Bakupost portalından əldə olunan məlumata əsasən, ain.az xəbər verir.
Bakıda Dövlət Sərhəd Xidmətinin (DSX) mayoru, əməkdar məşqçi Fuad Zeynalov və onun tanışı Anar Süleymanova hücum etməkdə təqsirləndirilən kikboks üzrə idmançılar - Elçin Hüseynov, Musa Əhmədov, Elnur Həmidovun cinayət işi üzrə məhkəmə prosesi başa çatıb.
Bakupost.az axar.az-a istinadla xəbər verir ki, Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən prosesdə dövlət ittihamçısı ittiham nitqi ilə çıxış edib.
O, Elnur Həmidovun 9, Elçin Hüseynovun 2 , Musa Əhmədovun isə 3 il 6 ay müddətə azadlıqdan məhrum edilməsini istəyib.
Daha sonra təqsirləndirilən şəxslərin vəkilləri müdafiə çıxışı ediblər. Təqsirləndirilən şəxslər son söz deyəndən sonra hakimlər heyəti hökm qəbul etmək üçün müşavirəyə yollanıblar.
Müşavirədən qayıdan hakimlər hökm elan edib.
Hökmə əsasən, Elnur Həmidov 1 il 6 ay sınaq müddəti olmaqla şərti, Elçin Hüseynov 3 il müddətə azadlığın məhdudlaşdırılması, Musa Əhmədova isə 1 il sınaq müddəti olmaqla şərti cəza verilib.
Onların hər biri barəsində seçilmiş həbs qətimkan tədbiri dəyişdirilib, onlar məhkəmə zalından azadlığa buraxılıblar.
Xatırladaq ki, hadisə bu ilin yanvar ayının 4-də Bakının Xətai rayonunda baş verib.
İttihama görə, idmançılar - Elçin Hüseynov, Musa Əhmədov və Elnur Həmidov DSX mayoru, kikboksinq üzrə Əməkdar məşqçi və Əməkdar idman ustası Fuad Zeynalova hücum ediblər.
Məlum olub ki, onlar bu əməli Kikboksinq Federasiyasının I vitse-prezidenti Ramal Aslanovun sifarişi ilə törədiblər.
İstintaq orqanı tərəfindən Elnur Həmidova Cinayət Məcəlləsinin 126.2.4 (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma) və 221.3-cü (bu məcəllənin 221.1-ci və ya 221.2-ci maddələrində nəzərdə tutulmuş əməllərin silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) maddələri ilə, Musa Əhmədova 221.3-cü maddəsi ilə, Elçin Hüseynova isə 221.2.1 (bir qrup şəxs tərəfindən və ya təkrar törədildikdə xuliqanlıq törətmək) maddəsi ilə ittiham irəli sürülüb.
Qeyd edək ki, bu cinayət işində adı keçən Ramal Aslanov, Elvin Məmmədov və digər şəxslərin əməllərinə hüquqi qiymət verilməsi üçün Cinayət Məcəlləsinin 221-ci maddəsi ilə ayrıca icraata cinayət işi ayrılıb.
Ən son xəbərləri və yenilikləri almaq üçün ain.az saytını izləyin.
