Azərbaycanın kino və dublyaj aktyoru, 73 yaşlı Əməkdar artist Eldəniz Rəsulov Musavat.com-un əməkdaşı ilə söhbətləşib.
Adətən müsahibə verməyi xoşlamayan aktyor elə sullarımıza da qısa cavab verməklə kifayətlənib. Onunla söhbətə hazırda nə işlə məşğul olması ilə başladıq:
- 73 yaşım var, harada işləyə bilərəm ki, evdəyəm. İş olsa, niyə işləməyim ki.
- Siz uzun müddət televiziyada dublyaj aktyoru kimi çalışmısınız. Niyə bu işdən uzaqlaşdınız?
- Uzaqlaşmadım, özləri uzaqlaşdırdılar. Mən də çıxıb evdə oturdum. Əlbəttə, mənim də ürəyimdən işləmək keçir. Evdə çox darıxıram.
- Bəs indi gününüzü necə keçirirsiniz?
- Heç nə etmirəm, televizorda Zaura, Elgizə baxıram. Ömrüm belə keçib gedir.
- Yəqin nəvələrə baxırsınız, onlarla baş qatırsınız...
- Onlar mənə baxsın, yaşlı kişiyəm... (gülür)
- Mətbuatda, efirlərdə görünmürsünüz. Sanki qaçırsınız...
- Danışmaq istəmirəm. Nə deyim, nə dinim. Guya mən danışsam, nəsə düzələcək, heç nə düzələn deyil axı.
- Mətbuata bir və ya iki dəfə geniş müsahibə vermisiniz...
- Onda da razı deyildim, məni aldatdılar deyə gedib müsahibə verdim. Ondan sonra heç yerdə görünməmişəm.
- Bəli, uzun müddətdir ki, sizi görmürük. Heç bir verilişə çıxmırsınız. Yeri gəlmişkən, "Gümüşgöl əfsanəsi" filmində çox yaraşıqlı idiniz. İndi də elə yaraşıqlısınız?
- Kim, mən? Mən yaraşıqlı deyiləm.
Qeyd edək ki, Eldəniz Rəsulov Qeybulla oğlu 30 aprel 1952-ci ildə Qaxda anadan olub. 1974-cü ildə Azərbaycan Dövlət İncəsənət İnstitutunun dram və kinoaktyorluğu şöbəsini bitirib. "Azərbaycanfilm" kinostudiyasının nəzdində fəaliyyət göstərən kinoaktyor teatr studiyasında çalışıb. 1971-ci ildən bədii filmlərə çəkilib: "Sevinc buxtası" (Seyidov), "Babək" (Azin), "Anlamaq istəyirəm" (Zeynal), "Nizami" (Maxan, Bəşir), "Gümüşgöl əfsanəsi" (Fərid), "Şeytan göz qabağında" (Zeynal), "Ovsunçu" (kəndxuda) və s.
Azərbaycan Televiziyası və Lider TV-də çoxseriyalı bədii televiziya və sənədli filmlərin dublyajı prosesində fəal iştirak edib. Dramaturq Qeybulla Rəsulovun oğludur.
2008-ci ildə "Azərbaycan Respublikasının Əməkdar artisti" fəxri adına layiq görülüb. Azərbaycan Kinematoqrafçılar İttifaqının üzvüdür.
Şahanə Rəhimli
Musavat.com
