ain.az bildirir, Qaynarinfo portalına istinadən.
"OpenAI” şirkəti ChatGPT platformasında böyüklər üçün nəzərdə tutulan erotik məzmunlara icazə verəcək yeni funksiyaları elan edib.
Qayanrinfo xəbər verir ki, şirkətin baş direktoru Sem Altman istifadəçilərin bu dəyişikliklər çərçivəsində "təhlükəsiz təcrübə” yaşayacaqlarını bildirib.
Daha insana bənzər ChatGPT
Altman çərşənbə axşamı X sosial platformasında paylaşdığı açıqlamada qeyd edib ki, gələcək ChatGPT versiyaları daha insani davranışlar nümayiş etdirə bilər. O vurğulayıb ki, bu xüsusiyyət məcburi şəkildə deyil, yalnız istifadəçi istəyərsə aktiv olacaq.
Bu addım İlon Maskın "xAI” şirkətinə məxsus "Grok” platformasında iki cinsi məzmunlu süni intellekt modelini təqdim etməsindən sonra atılıb və "OpenAI”ın ödənişli istifadəçi bazasını genişləndirməsinə kömək edə bilər.
Hüquqi təzyiqlər və əvvəlki məhkəmə işləri
Altmanın açıqlamasından sonra BBC-nin şərh sorğusuna "OpenAI” cavab verməyib. Şirkətin bu qərarı ABŞ-da bir gəncin intiharından sonra ailəsinin qaldırdığı iddiadan sonra gündəmə gəlib.
16 yaşlı Adam Reyn adlı gəncin valideynləri Mett və Mariya Reyn "OpenAI”a qarşı ilk "səhlənkarlıq nəticəsində ölüm” iddiasını qaldırıblar. Onlar şirkətin valideyn nəzarəti vasitələrinin yetərsiz olduğunu bildiriblər. Məhkəmə materiallarına görə, Adam ChatGPT ilə intihar düşüncələrini bölüşdüyü yazışmaları aparıb.
Altman etiraf edib ki, "OpenAI” əvvəl ChatGPT-ni "ruhi sağlamlıq mövzularında ehtiyatlı olmaq üçün kifayət qədər məhdudlaşdırılmış” vəziyyətdə saxlayırdı. Lakin bu məhdudiyyətlər psixoloji problemi olmayan istifadəçilər üçün mənfi təcrübə yaradıb. Buna baxmayaraq, o, mövzunun ciddiliyinə görə doğru addımlar atmağa çalışdıqlarını bildirib.
Ruh sağlamlığı riskləri azaldılıb, yeni vasitələr təqdim olunur
Şirkət indi ciddi psixoloji riskləri azalda bilən yeni vasitələrə malikdir. Bu səbəbdən bəzi məhdudiyyətlər təhlükəsiz şəkildə yumşaldıla biləcək. Altman bildirib ki, dekabr ayında yaş məhdudiyyətlərinin daha geniş tətbiqinə başlanacaq və yalnız şəxsiyyəti təsdiqlənmiş yetkinlər üçün erotik məzmunlara icazə veriləcək.
Qanunvericilik müzakirələri genişlənir
Tənqidçilər hesab edirlər ki, "OpenAI”ın bu qərarı həm federal, həm də ştat səviyyəsində daha çox hüquqi tənzimləmə tələb edir. "Boies Schiller Flexner” hüquq firmasından Cenni Kim deyib: "Uşaqların bu tip böyüklər üçün nəzərdə tutulan məzmunlara çıxışının qarşısının necə alınacağı hələ aydın deyil”.
Kim daha əvvəl "Meta” şirkətinə qarşı gənclərin psixikasına zərər vurduğu iddia edilən "Instagram” alqoritmi ilə bağlı məhkəmə işində də iştirak edib.
"TechCrunch” nəşri bu ilin aprelində xəbər vermişdi ki, bəzi azyaşlı istifadəçilər özlərini böyüklər kimi qeydiyyatdan keçirərək "OpenAI” sistemində açıq məzmun yarada bilirlər. Şirkət həmin vaxt bu vəziyyəti məhdudlaşdırmaq üçün tədbirlər gördüyünü açıqlamışdı.
Gənclər və süni intellekt münasibətləri
Bu ay dərc edilən araşdırmaya əsasən, tələbələrin beşdə biri ya özü, ya da tanıdığı biri süni intellektlə romantik əlaqə yaşadığını etiraf edib.
Kaliforniya qubernatoru Qevin Nyusom isə süni intellektlə çalışan çat-botların gənclərə zərərli davranışları təşviq edə biləcəyinə dair qanun layihəsini veto edib: "Gənclərin süni intellekt sistemləri ilə təhlükəsiz şəkildə ünsiyyət qurmağı öyrənməsi həyati əhəmiyyət daşıyır”.
ABŞ Federal Ticarət Komissiyası (FTC) və Senatdakı təşəbbüslər də süni intellekt çat-botlarının uşaqlarla qarşılıqlı əlaqəsini tənzimləməyə yönəlib. Hazırlanan qanun layihəsi istifadəçilərə süni intellekt platformalarına qarşı hüquqi iddia qaldırmaq imkanı verir.
"OpenAI”ın böyüyən bazardakı mövqeyi
Altmanın açıqlamaları süni intellekt şirkətlərinin sürətlə artan bazar dəyərlərinə dair şübhələrin yarandığı dövrə təsadüf edir. "OpenAI” gəlirlərini artırsa da, hələ mənfəət əldə etməyib. "Tülən” Universitetinin biznes professoru Rob Lalqa bildirib: "Heç bir şirkət ChatGPT qədər sürətlə qəbul olunmayıb. Şirkət bazar payını qorumaq üçün bu artım tempini davam etdirməlidir”.
Aydın
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
