Rusiya Federasiyasına daxil olan Başqırdıstan Respublikasının Prezidenti Radiy Həbirov ötən gün bölgənin Sterlitamak şəhərində yerləşən “Avanqard” fabrikində baş verən partlayış nəticəsində 3 nəfərin həyatını itirdiyini açıqlayıb.
Turkustan.az xəbər verir ki, Radiy Həbirov hadisə ilə bağlı Telegram kanalında verdiyi açıqlamada bildirib ki, partlayış nəticəsində fabrikə məxsus bir bina tamamilə dağılıb:
"Təəssüf ki, 3 nəfər həlak olub. Onların hamısı qadındır. Həlak olanların ailələrinə dərin hüznlə başsağlığı verirəm."
Həbirov əlavə edib ki, partlayış zamanı 8 nəfər xəsarət alıb, onlardan 5-i hazırda xəstəxanada müalicə olunur.
Fabrikin fəaliyyət sahəsinə toxunan Prezident qeyd edib ki, müəssisədə partlayıcı maddələr istehsal olunur. Bununla belə, partlayışın pilotsuz uçuş aparatı (PUA) hücumu nəticəsində baş vermədiyini vurğulayıb:
“Partlayışın səbəbi araşdırılır. Bu, PUA hücumu deyildi.”
Hadisə ilə bağlı araşdırma davam etdirilir.
Aytən Yaşar/ Turkustan.az
