Bakı Apellyasiya Məhkəməsində quldurluqda və yetkinlik yaşına çatmayanı cinayətkar fəaliyyətə cəlb etmədə təqsirləndirilən 1997-ci il təvəllüdlü Maqsud Səfərov və 2006-cı il təvəllüdlü Sənan Məcidovun (hər ikisinin adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası yekunlaşıb.
Pravda.az-ın əldə etdiyi məlumata görə, sonuncu keçirilən prosesdə qərar elan olunub.
Qərara əsasən, apellyasiya protesti təmin edilib, Maqsud Səfərovun Cinayət Məcəlləsinin 170.3 və 181.2.1-ci maddələri ilə təqsirli bilinərək məhkum edilməsinə dair Bakı Ağır Cinayətlər Məhkəməsinin hökmü dəyişdirilib, Səbail Rayon Məhkəməsinin 12 noyabr 2020-ci il tarixli hökmü ilə, ona təyin olunmuş cəkilməmiş 400 manat cərimə cəzası, hazırki hökm üzrə təyin olunmuş cəza ilə tam toplanılmaqla ona qəti olaraq 9 il ay müddətinə azadlıqdan məhrumetmə və 400 manat cərimə cəzası təyin olunub.
İttihama görə, Maqsud Səfərov on səkkiz yaşına çatmış şəxs olmaqla, özgənin əmlakını ələ keçirmək məqsədilə yetkinlik yaşına çatmayan tanışı, 2006-cı il təvəllüdlü Sənan Məcidovla əvvəlcədən razılığa gəlib, cinayət əlaqəsinə girib. O, azyaşlı tanışına quldurluq etməklə əldə ediləcək qazancı bərabər böləcəkləri barədə vəd verərək onu ağır cinayətin törədilməsinə təhrik edib.
Bu məqsədlə Maqsud qabaqcadan əlbir olan bir qrup şəxs halında 17 yanvar 2024-cü il tarixdə, saat 20:25-də Bakı şəhəri, Suraxanı rayonu, Əmircan qəsəbəsi, T.Bayram küçəsində yerləşən “Zeytun-272” adlı aptekə daxil olublar. Onlar üzərlərində olan oyuncaq tapançanı silah qismində istifadə edərək aptekdə əczaçı işləyən zərərçəkmiş S.S. (adı, soyadı şərtidir) tərəfə tuşlayıblar və onun həyatı və sağlamlığı üçün təhlükəli zorakılıq tətbiq edəcəkləri hədəsi ilə pulları tələb ediblər. Lakin həmin vaxt aptekə müştərinin daxil olmasını görən şəxslər niyyətlərini axıra çatdıra bilməyib, hadisə yerindən qaçıblar.
Hadisədən sonra hər iki şəxs saxlanılaraq cinayət məsuliyyətinə cəlb edilib.
Bakı Ağır Cinayətlər Məhkəməsinin hökmü ilə Maqsud Səfərov 9 il 6 ay və Sənan Məcidov isə 7 il 6 ay müddətinə azadlıqdan məhrum edilmişdi.
Kamal Məmmədov
