Azərbaycan fındıq və badamının Çinə ixracına dair protokolun imzalanması Azərbaycan prezidenti İlham Əliyevin Çinə səfərinin əsas yekunu olub. Oxuməni.az -ın məlumatına görə, bunu Azərbaycan nümayəndə heyətinin Çinə işgüzar səfərinin yekunları ilə bağlı “Sinxua” agentliyinə Azərbaycan Qida Təhlükəsizliyi Agentliyinin (AQTA) rəhbəri Əkbər Əliyev deyib.
"Bu il Azərbaycan Respublikasının Prezidenti cənab İlham Əliyev Çin Xalq Respublikasına səfər etdi. Bu səfər ikitərəfli münasibətlərə mühüm təkan verdi", - Əkbər Əliyev qeyd edib. O, məhz bu əlaqələrin inkişafı sayəsində fındıq ixracı layihəsinin həyata keçirildiyini, Azərbaycan istehsalçılarına dünyanın ən böyük bazarlarından birinə çıxış açdığını vurğulayıb. "Agentlik nümayəndə heyətinin səfərinin məqsədi Azərbaycan fındıq və badamının Çinə ixracına dair protokolun imzalanması olub. Biz çinli həmkarlarımızla sıx əməkdaşlıq etmişik və bundan sonra da toyuq məhsulları, alma, giləmeyvə kimi digər məhsulların ixracını genişləndirəcəyik".
Əkbər Əliyevin sözlərinə görə, protokolun imzalanması Azərbaycan və Çin arasında kənd təsərrüfatı məhsullarının ixracının daha da genişləndirilməsi və iqtisadi əməkdaşlığın gücləndirilməsi üçün möhkəm zəmin yaradır.
AQTA-nın nümayəndə heyəti bu yaxınlarda Çində səfərdə olub və bu səfər zamanı Çin Xalq Respublikasının Baş Gömrük İdarəsi ilə “Azərbaycandan Çinə ixrac edilən fındıq və badamın yoxlanılması, karantin və sanitar tələblərinə dair Protokol”, eləcə də "İdxal və ixracda ərzaq təhlükəsizliyi sahəsində əməkdaşlıq mexanizmi haqqında sənəd layihəsi" imzalanıb.
Almaz Həsənli
