Tesla 2026-cı ilin sonuna qədər Optimus robotlarının kütləvi istehsalına başlayacaq...
Poliqon xəbər verir ki, amerikalı milyarder İlon Mask “Tesla” şirkətinin “Optimus” adlı insanabənzər robotlardan ibarət “milyonluq ordu” yaratmağı planlaşdırdığını açıqlayıb. Bu barədə məlumatı Wired nəşri yayıb. Məlumata görə, layihənin tammiqyaslı istehsal mərhələsinə 2026-cı ilin sonuna qədər başlanacaq.
Mask investorlarla görüş zamanı gələcəkdə “Tesla” üzərindəki idarəetməyə nəzarət məsələsinə narahatlığını ifadə edib. O, “robot ordusunun potensial təsiri”nə görə şirkətdə təsir gücünün azalmasını istəmədiyini vurğulayıb. “Mənə bu robot ordusunu yaratmaq narahatlıq verir, əgər şirkətə ciddi təsir imkanım qalmazsa,” — deyə Mask Tesla investorları ilə görüşdə bildirib.
İlon Maskın sözlərinə görə, “Tesla” hazırda “Optimus” robotunun seriyalı istehsal üçün tam hazır prototipini 2026-cı ilin fevral–mart aylarında təqdim etməyi planlaşdırır. Bu robotlar insanla eyni ölçü və hərəkət çevikliyinə malik olacaq və ilkin mərhələdə sənaye və məişət sahələrində istifadə üçün nəzərdə tutulur.
Wired nəşrinin məlumatına əsasən, noyabr ayında “Tesla” səhmdarları şirkətin İlon Maska qarşıdakı 10 il ərzində 1 trilyon dollar ödəniş planını səsverməyə çıxaracaq. Razılaşma qəbul edilərsə, Maskın şirkətdəki payı 13%-dən 25%-ə yüksələcək. Lakin milyarder bu məbləği yalnız müəyyən hədəflərə — 20 milyon avtomobilin istehsalına, 1 milyon robotaksi xidmətinin istifadəyə verilməsinə, şirkətin 8,5 trilyon dollarlıq bazar dəyərinə çatmasına və 1 milyon “Optimus” robotunun istehsalına nail olduqdan sonra əldə edə biləcək.
Poliqon.info
