ABŞ prezidenti sərt tədbirlərdən imtina edərək enerji sektoruna yönəlmiş məhdud sanksiyalara üstünlük verib...
Poliqon xəbər verir ki, The Wall Street Journal nəşrinin məlumatına görə, ABŞ prezidenti Donald Trampa Rusiya ilə bağlı üç fərqli sanksiya paketi təqdim olunub. Onlardan biri sərt, digəri orta, üçüncüsü isə daha yumşaq xarakter daşıyıb. Tramp bu variantlar arasında “mülayim” sayılan ikinci seçimi — enerji sektoruna yönəlmiş sanksiyaları qəbul edib.
Mənbələrin bildirdiyinə görə, ən sərt variant Rusiya sənayesinə və yüksək vəzifəli dövlət rəsmilərinə birbaşa təsir etməyi, daha yumşaq variant isə yalnız məhdud sayda iqtisadi sahələri əhatə etməyi nəzərdə tuturdu. Trampın seçdiyi orta variant enerji ixracı və maliyyə əməliyyatlarına məhdudiyyətlər qoyur, lakin ölkənin sənaye və istehsal sahələrinə toxunmur.
Sabiq ABŞ xüsusi nümayəndəsi Kurt Volker nəşrə açıqlamasında qeyd edib ki, Tramp sanksiyalarda tam sərtlik nümayiş etdirmək istəmir, çünki Rusiya ilə diplomatik razılaşma əldə etməyə hələ də ümid bəsləyir. “Tramp bəzi məsələləri açıq saxlayır, çünki o, hələ də Putinlə anlaşma əldə etmək istəyir,” — deyə Volker bildirib.
Ekspertlər hesab edirlər ki, bu qərar Ağ Evin Moskva ilə münasibətlərdə kompromis yanaşma axtarışında olduğunu göstərir və Tramp administrasiyasının sanksiyaları daha çox siyasi təzyiq vasitəsi kimi istifadə etməyi planlaşdırdığını təsdiqləyir.
Poliqon.info
