İsrailin “Davar” qəzeti Türkiyənin Qəzza məsələsindəki rolunun Təl-Əvivdə ciddi narahatlıq yaratdığını yazıb. Nəşr qeyd edib ki, Ankara artıq regionda diplomatik deyil, hərbi və strateji güc kimi qəbul edilir.
Publika.az xəbər verir ki, nəşrə danışan Tel-Əviv Universitetinin Türkiyə üzrə eksperti Hay Eytan Cohen Yanarocak, Türkiyənin Qəzzaya hərbi müdaxilə ehtimalının İsrail üçün “qırmızı xətt” olduğunu bildirib:
“Türkiyə ordusunun Qəzzaya girişi İsrailin təhlükəsizliyi üçün ən böyük risk sayılacaq və bütün planları alt-üst edə bilər”.
Ekspertin sözlərinə görə, Rəcəb Tayyib Ərdoğan yalnız Fələstin məsələsində deyil, bütün müsəlman coğrafiyasında öncül lider kimi çıxış edir: “Türkiyə bölgədə nüfuzunu artırmaq, geniş coğrafiyada təsir sahibi olmaq istəyir. İsrail isə bu hədəfin qarşısında əsas maneə kimi görünür”.
