Bizimyol saytından alınan məlumatlara görə, ain.az xəbər verir.
Rusiya Ukraynanın ikinci ən böyük şəhəri Xarkova hücum edərək uşaq bağçasına zərbə endirdi. Vladimir Zelenski uşaqların təxliyə edildiyini və onların çoxunun "kəskin stress reaksiyalarından" əziyyət çəkdiyini bildirdi. Mer İqor Terexov və Xarkov Regional Dövlət Administrasiyasının rəhbəri Oleq Sinegubov ən azı üç partlayışın baş verdiyini bildirdilər.
Rusiya artıq müharibə qaydalarının əleyhinə addımlar atmaqdadır…
Bizimyol.info xəbər portalına danışan Siyasi və Hüquqi Araşdırmalar Mərkəzinin (SHAM) sədri Xəyal Bəşirov bildirib ki, Rusiya-Ukrayna müharibəsi çox təhlükəli bir mərhələyə qədəm qoyub.
Xəyal Bəşirov
“Bir neçə aydan sonra dörd ili tamam olub, beşinci ilə keçəcək ki, Rusiya-Ukrayna müharibəsi davam edir və son zamanlar aktiv müharibə fazası olaraq ən uzunmüddətli müharibələrdən hesab oluna bilər. Bir tərəfdən sülh danışıqları ilə bağlı cəhdlər olur, atəşkəsin əldə edilməsi və Rusiya ilə Ukrayna arasında danışıqlar prosesinin reallaşdırılması istiqamətində Amerika Birləşmiş Ştatlarının prezidenti Donald Tramp başda olmaqla təşəbbüslər var, cəhdlər var. Amma hələ ki, hamısı uğursuzdur və bu uğursuzluq təbii ki, müharibə meydanında iştirak edən tərəflərə də təsir göstərir.
İlk öncə onu nəzərə almaq lazımdır ki, döyüş meydanında heç bir tərəf uğur əldə edə bilmir. Ukrayna tərəfi canlı qüvvə çətinlikləri, məhdudiyyəti yaşayır. Canlı qüvvə çatışmazlığı Ukraynanın döyüş meydanında onun mövqeyinə çox ciddi təsir göstərir və bu amillər Ukraynaya döyüş meydanında nəinki irəli getməyə mane olur, əksinə geri getməyə və addım- addım öz ərazilərini itirməsinə gətirib çıxarır. Amma Rusiya tərəfi də elə bir ciddi uğur əldə edə bilmir. Rusiya döyüş meydanında əldə edə bilmədiyi uğurları fərqli formada kompensasiya etməyə cəhd göstərir. Hər iki tərəf artıq müharibə müharibənin aparılması qaydalarının əleyhinə olan konvensiyaların tələblərini pozur. Ümumiyyətlə, müharibənin aparılması qaydalarına zidd addımlar atır. Döyüş meydanında uğur əldə edə bilməyəndə, təbii ki, bu yollara əl atılır”-deyən Xəyal Bəşirov qeyd edib ki, Rusiya tərəfi Ukraynanın sivil şəhərlərini Xarkovu, Kiyevi və yaxud digər şəhərləri hədəfə alır.
Politoloqun fikrincə, döyüş meydanında uğur əldə edə bilməyəndə, istəyinə nail ola bilməyəndə, tərəflər ölkə daxilində xaos yaratmaq, insanları panika vəziyyətində saxlamaq və bu yolla istəyinə nail olmaq niyyətini həyata keçirir: “Ukrayna da eyni şəkildə dronlarla və yaxud da digər vasitələrlə Rusiyanın şəhərlərinə hücumlar təşkil edir. Bu gün Ukraynanın dəstəyinin olmaması, Rusiyanın Ukrayna ərazilərinə qanunsuz olaraq daxil olması amilini nəzərə alsaq, Ukraynanın atdığı bu addımlar indiki mərhələdə onların prizmasından yanaşanda anlaşılandır. Amma bu da müharibə qaydaları əleyhinə olan addımdır. 1899-cu il Haaqa Konvensiyası, 1907-ci ildə İkinci Haaqa Konvensiyasının tələbləri quruda döyüş əməliyyatlarını aparmaq və digər addım atmaq, eyni zamanda Cenevrə konvensiyalarının tələblərini pozur. 1977-ci il Cenevrə Konvensiyalarına əlavə protokolların tələblərini ciddi şəkildə pozur. Bu, beynəlxalq humanitar hüququn tələblərinin çox sərt şəkildə pozulması deməkdir.
Eyni zamanda, BMT qətnamələrinin pozulmasına gətirib çıxarır. Bunu beynəlxalq hüquq görür. Volodimir Zelinskinin qeyd etdiyi kimi, bu, beynəlxalq hüquqla danışıqlar prosesini reallaşdırmağa cəhd göstərən və sülh prosesini reallaşdırmaq istəyən tərəflərə olan bir cavabdır”.
İradə Cəlil, Bizimyol.info
Ən son xəbərləri və yenilikləri almaq üçün ain.az saytını izləyin.
