Rusiya rəhbərinin qərarvermə tərzi ölkə elitasını çaşqın vəziyyətdə qoyur...
Poliqon xəbər verir ki, Kreml daxilində narahatlıq hissi getdikcə artır, çünki Rusiya Prezidenti Vladimir Putinin qərarvermə prosesi getdikcə daha qapalı və nəzarətsiz hala gəlir. The Economist yazır ki, elitanın taleyi bir şəxsin, Putinin əlində cəmləşib, lakin indi o, demək olar ki, heç kim üçün əlçatmaz olub.
Jurnalın məlumatına görə, yüksəkvəzifəli məmurlar, müşavirlər və iri biznes nümayəndələri artıq qərar qəbul edərkən Putinin nəyi bəyənə biləcəyini təxmin etməyə çalışırlar. Lakin bu, əksər hallarda “kor oyun”a çevrilib. Aydın göstərişlərin və istiqamətin olmaması nəticəsində Kremlin daxilində fərqli təxminlər və fərziyyələr formalaşır.
Mənbələrdən biri bildirir ki, əsas qorxulardan biri Putinin döyüş əməliyyatları başa çatdıqdan sonra hakim sinifdə daha genişmiqyaslı dəyişikliklərə hazırlaşmasıdır. İddiaya görə, prezident “köhnə qvardiyanın” bir hissəsini qurban verərək, hakimiyyəti və resursları müharibə dövründə sadiq qalan çevrələrinə yönəltmək niyyətində ola bilər.
The Economist qeyd edir ki, bu vəziyyət Kreml elitasında həm siyasi, həm də şəxsi səviyyədə dərin qeyri-müəyyənlik yaradıb. Çünki hər kəs Putinin növbəti addımının nə olacağını təxmin etməyə çalışır, lakin heç kim əmin deyil.
Poliqon.info
